Lopez-a'n World Cup khel thei dawn lo

Spain midfielder Fermin Lopez chuan a kephah hliam vangin World Cup a khel thei dawn lo - Lopez hi Pathianni liam taa Barcelona-in 3-1 a Real Betis an hnehna inkhelah a inhliam a, kum 23 mi World Cup khelh beiseina chu a thamral zui.

Lopez chuan, "Ka hliam chu zai a ni a, engkim tluang takin a kal e. Tunah chuan taksa leh rilru inpeih at chunga lo kir leh thuai turin ka inbuatsaih mek a ni. Hringnun leh football hi chuan nunrawng chang a nei a, beisei loh thil a thlen chang a awm leh ṭhin.

"Mahse, hei hi kan zinkawngah a tel vek a ni, tih pawm thiam a ngai a ni. Hun harsa tak ka tawng mek a, ka career-ah chona dang a inchhawp leh ta - ka paltlang ngei ang tih pawh ka ring a, in lam aṭangin Spain-a ka ṭhiante chu ka lo thlawp mai a ngai dawn a ni," a ti a, a khawngaihthlak hle - a chawlh chen tur hi chiang taka puan a awm lo.

Ram tana vawi sarih inlan tawh Lopez hi World Cup squad-a tel ngei tura ngaih zinga mi a ni. Tun season-ah Barca tan hliam vanga vawi hnih ngawt a chawl chungin match 48 a khel a, goal 13 khungin assist vawi 17 a nei thei.

La Roja coach Luis de la Fuente chuan Thawhṭanniah hian Spain squad hi a puang dawn a, Lopez hming lam tel a ni dawn ta lo. Spain hi group H-ah Cape Verde, Saudi Arabia leh Uruguay te nen an awm ho dawn a, round of 32 luhna chance a sang hle.