Xhaka hoa inlan tur Switzerland

Sunderland captain Granit Xhaka chuan an ram tana captain armband hreng chungin World Cup a hmachhawn dawn a, a zawna World Cup vawi li a khelhna tur a ni dawn - Xhaka hi Switzerland tana inlan hnem ber player niin, vawi 144 ngawt ram tan a inlan tawh.

Xhaka ang thoin Real Betis full back Ricardo Rodriguez pawhin a vawi li nan World Cup a khel dawn a, ram tan match 136 zet a khel tawh bawk. Switzerland manager Murat Yakin-a'n player tawnhriat nei ṭha ho a thlang nual a, World Cup 2022-a Swiss team tana inlan aṭangin player 17 ngawt an la tel.

Premier League aṭangin Nottingham Forest striker Dan Ndoye, Leeds United forward Noah Okafor leh Burnley attacker Zeki Amdouni te pawh koh an ni a, Amdouni hian hliam vangin tun season-ah league match thum chauh khel mah se, Yakin-a'n a ko ta tho.

Yakin chuan, "100% in a fit a, kan khelh dan phung man sa, a hna hrechiangtu a ni a, kan squad-a a tel thei hi kan lawm hle," a ti a, hetihlai hian international break hnuhnung bera squad-a tel Young Boys forwards Alvyn Sanches leh Joel Monteiro erawh koh zingah an tel lo thung!

Hetihlai hian Switzerland sawi apianga mitthlaa lo lang ṭhin, Xherdan Shaqiri chu tun World Cup-ah hian ram tan a feh chhuak dawn lo - kum 2010 hnua Swiss team-in Shaqiri tel loa World Cup an hmachhawn hmasak ber tur a ni dawn a, a lunglenthlak hle.

Kum 34 mi Shaqiri hian World Cup vawi li bakah, Euro vawi thum a khel hman a, July 2024 khan ram tana inkhelh a chawlhsan thu hi a puang - match 125 khelin, goal 32 a khung.

Shaqiri hi Swiss Super League lamah FC Basel tan a la hmuhnawm ṭhin viau - tun season-ah pawh inelna hrang hrangah match 47 khelin, goal 16 a khungsak a, assist vawi 13 a la nei thei.

Switzerland hi group B-ah awmin, Qatar, Bosnia-Herzegovina leh inelna thlengtu zinga mi Canada te nen group khatah an awm ho.