Hei le, Mizoram Police chu...
Nilaini zan khan Mizoram Police-in Lammual inkhel hmuhnawm takah Chanmari FC 2-1 in an hneh. Lalbiaksanga Colney hoten Mizoram Premier Legue-a vawi thum a zawna an chak loh hnuah hnehna an chang a, round 8 zawhah semifinal khel pha chinah an awm.
Chanmari FC erawh S. Mal-sawmtluanga nen an inṭhen hnuah match thum an khelh aṭangin point thum chauh an hlawhchhuah avangin panganaah an awm thung. MPL5 champion hian inkhel bul erawh an ṭan ṭha a, a tawp an khar ṭhat tawk loh avangin hmabak a harsa chho ang.
Chanmari an ṭha
Chanmari hian an player pawimawh H. Lalmuankima leh Lalremruata (Tuikual North) te an chhawr thei lo chungin na takin Police an nawr nghal. Ṭan deuh chiahah David Laltlansanga'n (Avida) goal ban a volley per a, Lalnunzama ball pet ṭha tak chu keeper Lalmuanawma'n a dang a, Zakaria Lalhriatpuia leh Zama cross chu Ramhlun South tlangval Lalremruata'n (Bata) goal-ah a chantir thei lo ve ve.
Police an huai
Police striker Malsawmfela a hunah tak a rah a, minute 43-naah a chance ṭha neih hmasak chu chiang zetin goal-ah a pet lut. Second half-ah Sawmfela leh Chanmari foreigner Godwin te chu hnawhchhuah theih dinhmunah an ding ve ve a, an chungah referee-in zahngaihna a lantir. Police an chet ṭhat chhoh lai takin Chanmari substitute David Lalrinmuana'n mawi zetin freekick aṭangin a khung a, 1-1 a ni.
Chanmariin point hlawh chhuak ngei tura an inngaih tawh laiin point khatah Police an lawm lo a, na taka an nawr avangin a tawpah goal an hlawh chhuak. Minute 88-naah R. Malsawmtluanga corner pet chu keeper Zothanmawia'n hmun himah hnek chhuak thei loin Police forward F. Lalrinpuia'n (Valpuia) chakna goal khung nan a hmang.
An vanduai e
Chanmari FC manager Lalhmangaiha Sailo chuan, "Kan khel ṭha a, kan vanduai a ni. Kan chance neih zo zai te kha goal se inkhel a danglam tur. Sawmfela pawh red card hmu ngei turah kan ngai," tiin Vanglaini a hrilh.
Chanmari hian Inrinni zan dar 7:00 hian an hnuai chiaha awm FC Venghnuai an hmachhawn dawn. Police leh Chanmari inkhel hi Venghnuai coach Rindika Hmar chuan uluk takin Lammual aṭangin a zir chiang a, hei hian an inkhel leh tur pawimawhzia a sawifiah.