DSport-ah I League - ṭan hun November 30

All India Football Federation chuan chiang taka puanchhuahna la nei lo mah se DSport chuan I League an pe chhuak ngei dawn niin a lang ta a, inbiakna a kal mek. 

DSport hian match 75-80 inkar bak live-a pekchhuah an inzuam lo a, mahse AIFF lam hian match zawng zawng (110) pe chhuak tura an nawr mek avangin official taka thu puanzar theih a la ni lo. Inbiakna kal mek ang chuan I League match-te hi chawhnu dar 2:00, tlai dar 5:00 leh zan dar 7:00-ah te khelh ṭhin tur a ni a, AIFF chuan DSport hian a vaiin live-in pe chhuak se an duh a ni. 

AIFF League Committee member zinga mi, a hming tarlan loh chuan, "DSport hian match zawng zawng hi live-a an pekchhuah a rinawm a, inbiakna kalmek a nih miau avangin puanzar erawh a rem rih lo," a ti. 

Indian football chingchivet vel avangin I League hi a boruak thi mai tura ngaihna a awm a, mahse an rin ang a ni lo. Inelna hmachhawn tur hian club 11 an la awm. Mizo club Aizawl FC chuan inelna hi an hmachhawn ngei dawn niin a lang a, anni bakah hian Chennai City, Churchill Brothers, East Bengal, Gokulam Kerala, Indian Arrows, Minerva Punjab, Mohun Bagan, Neroca, Real Kashmir, Trau leh  Mohun Bagan te chu I League khel tur hian an inpuahchah mek. 

Manipur chuan a vawi khat nan I League-ah club pahnih an nei dawn a, Trau hi hmel thar an nih laiin Neroca erawh India ram football league inelna sang ber ni ṭhinah hian season hnih an khel tawh. Trau hian season hmasa second division-ah champion nomawi an chawi a, hei vanga tun season-a I League khel tur an ni. Indian football-ah 'Manipur derby' kan hmu thei dawn tihna a ni. 

Tun hnaiah Aizawl FC-in I League khelh an tum loh chungchang social media-ah a darh nasa a, mahse Vanglaini thudawn danin Mizo club hian I League khel tura tihfel ngaite an tifel tawh. Aizawl FC coach Stanley Rosario chuan, "I League khelh lo tur anga min sawi hi media aṭangin ka hre ve chauh a, kan khelh dawn leh dawn lohah thu ka nei ve lo. 

"Kei chuan coach ka nihna angin kan hmaa inchhawp inelna chu hmachhawn zel ka duh a, he club hian Mizoram football tana a hnathawh hi chhunzawm zel se ka duh a ni," tiin Vanglaini a hrilh. Mizo club hian tun dinhmunah chuan Mizoram Premier League an khel mek a, an tualchhung player neihten puitlin lam an pan zel avangin I League khel turin an ṭha tawk. 

AIFF-in Indian football kalphung ti danglam turin thutlukna an siam tawh a, he an ruahmanna hi October thlatir khan an puang zar tawh a, Asian Football Confederation (AFC) Executive Committee chuan kar hmasa khan he ruahmanna hi a pawmsak.

ISL chu league sang ber a nih tawh dawn avangin he inelnaa champion-ten AFC Champions League playoff an khel tawh dawn a, I League champion hian AFC Cup playoff an khel dawn thung. Ruahmanna thar ang chuan 2022-2023 season aṭangin  I League champion chuan franchise fee (vaibelchhe 13-15 inkar) chawi ngai loin ISL an khel ve thei dawn a, I League club tam zawk chuan he hun hi an thlirlawk a rinawm. 

Aizawl FC pawhin ISL khel turin hun ṭha an la nei dawn tihna a ni a, tuna hriat châkawm ber chu Indian football inher zel dan tur hi a ni ta.