Real an chak nuamsa

Ningani zan Spanish La Liga inkhelah Real Madrid-in nuamsain hnehna an chang a, an mikhual Leganes chu 5-0 in an sawp. 

Nipui transfer-a Real Madrid pantu Luka Jovic pawhin Spanish club tana a goal hmasa ber a khung ve ta a, hun pek belhah an goal ngana a khung. Real-in hnehna an chan avangin table-ah pahnihna dinhmun luahin an chho ve leh ta a, hmahruaitu Barcelona an phak lohna chu point khat chauh a ni. 

Barcelona chak thu hre sain Real Madrid an inlan a, an goal hmasa ber khung tur pawhin nghah rei an mamawh lo. Minute sarihna lekah Rodrygo chuan goal hmahruai a khung. Second 90 a liam hman awrh a, Toni Kroos chuan player ṭha bik a ni tih pholangin an goal hnihna a khung - minute riatah goal hnih an khung a, chak tur a chiang ṭan der!

Minute 24-naah Sergio Ramos vanneihna a her chhuak - a penalty pet chu dansak ni mah se Leganes goalkeeper Juan Soriano chu penalty pet hmaa goal line rap loah referee-in a ngai a, Ramos hian pet nawnin a goal. 

Real tana player langsar chu Karim Benzema a ni a, French striker hian a phu ang ngeiin minute 69-naah an goal thumna a khung - goal hi penalty aṭanga a khung a ni. Benzema hian an goal hmasa pahnih kum 18 mi Rodrygo leh Kroos-a khung chu a siamsak a ni a, Zinedine Zidane-a'n a rin tlat chhan chu khelmualah a pho chhuak leh ta. 

French striker hian league match kua a khelhah goal sarih a khung tling tawh bawk a, Zidane chuan, "Goal a khung piahlamah a team tan a thawh hlawk ṭhin a, minti lawm hle a ni," tiin a striker a fak.

Real ṭantuten hun pek belhah an lawmna belhchhah turin thil lawmawm an hmu a, chu chu bench aṭanga luhtir Jovic-a'n an goal ngana a khung kha a ni. Kum 21 mi striker hian nipui transfer lai khan euro maktaduai 60-in Real a pan a, mahse season hmasaa Bundesliga club Eintracht Frankfurt tana goal 27 khungtu hian beisei a phak lo. 

Nilaini zanah goal a khung ve ta a, inrintawkna a neih belh ang - Serbian striker hming hi Real tana goal khungtu zingah kan hmu chho zel a nih pawhin a mak ti suh.