Goal 10 luhna: Liverpool 5-5 Arsenal

Nilaini zan Carabao Cup inkhelah Liverpool leh Arsenal ten football game diktak min phochhuah sak a, goal 10 ngawt a lut!

Anfield-a inkhelah team pahnih hi 5-5 in an inhnehtawk a, chak zawk an awm loh hnuin penalty hmangin quarterfinal lut tur zawn a ni. Liverpool tana pettu player pangain an pet luh vek laiin Gunners tana Dani Ceballos pet chu goalkeeper Caoimhin Kelleher chuan a dansak a, a tawpah 5-4 in mualneitu an chak. 

Reds-in season hman ṭhat an chhawm nun zel laiin Gunners erawh result chhiain a um zui zel a ni ber a, Emirates Stadium-a Unai Emery hma hun a chiang ta lo hle. 

Anfield-ah goal hmu turin nghah rei a ngai lo. Minute rukna lekah Arsenal defender Shkodran Mustafi chuan an lamah a ti lut a, Reds fans thawm a ṭha. Mahse, Gunners an hnual rei lo - Gabriel Martinelli goal hnih leh Lucas Torreira goal hmangin an chhanglet a, minute 36-naah 3-1 in hma an hruai fel der. 

Kum 18 mi Martinelli hi Arsenal fans tan hmuhnawm a tling a, Brazilian striker hian tun season match sarih a khelhah goal sarih a khung tawh. Liverpool-in tlawm an tum bik lo. James Milner chuan minute 43-naah goal a rawn khung ve leh a, 3-2 a ni - chawlhlawk hman a ni zui a, goal a la lut dawn chauh!

Minute 54-na a ni a, goal bawk kan hmu leh ta. Ainsley Maitland-Niles chuan Arsenal-in chak an phu tih pholangin an goal lina a khung a, Anfield a ngui. Mahse, Reds-in Alex Oxlade-Chamberlain an nei. Ox hian Jurgen Klopp-a mamawh box pawn aṭanga goal khung thei midfielder a ni tih pholangin goal 'cial' zet a khung a, 4-3 a ni. 

Divock Origi-a'n Reds beiseina chhi nung zuiin a khung ve leh a, 4-4 a ni. A la tawp chuang lo! Minute 70-naah Joe Willock chuan a khung ve leh a, 5-4 a ni der. Reds hi an mualah an tlawm mai dawn niin a lang hman a, mahse hun pek belh minute linaah Origi chuan rawn khung ve lehin 5-5 in an inhnehtawk - penalty pet zui a ni a, Reds-in 5-4 in hnehna an chang. 

Liverpool fans tana lawmna tur chu naupang rual an khel a, an thiam em em mai kha a ni - inkhel bul ṭan 11 zinga pali chuan kum 20 pawh an la tling lo. January 2017 hnua League Cup-a Reds-in inkhel bul ṭan player an neih naupan ber a ni a, starting XI kum chawhrual chu kum 23 leh ni 122 chiah a ni. 

Kum 16 mi Harvey Elliott chuan penalty a hlawh chhuak a, kum 18 mi academy chhuak Neco Williams-a'n injury time-a Origi goal khung tur a siamsak a, Liverpool khaw tlangval Curtis Jones chuan penalty shoot out-ah chakna penalty a khung bawk. 

Penalty dangtu Kelleher kha kum 20 mi lek a la ni bawk! Rawlthar rual enin Klopp lung a awi ang tih a chiang a, an theihna anga an khel chhuak zel a nih chuan naupang rual hi nakina Liverpool ti Liverpool tu an la ni ang. 

Tun season-a a vawi thum nan Mesut Ozil chu inkhel bul ṭantir a ni a, German midfielder ṭangkaizia hmuh hmaih theih a ni lo - an goal pahnih chu a ke aṭanga chhuak a ni. Ozil khelha lang chhuak chu Arsenal-in tun season-a an mamawh 'creativity' leh 'quality' chu hman lohin an lo dah reng tih hi a ni a, Emery-a'n a duh lo tlat hi a chhanna zawn thiam a harsa. 

Liverpool tan Origi bawk chu fak phu a ni a, Belgian striker hian regular takin hmun chang phak lo mah se a hun neih ṭhatah erawh Reds chhanhimtu a ni ṭhin - goal hnih a khung pawh 'class' tiin a sawi ngam. Kum 24 mi striker hian season hmasa Champions League semifinal leh final-ah goal pawimawh a lo khung tawh bawk a, hun pawimawh bik atana duan awm reng a ni.