A tawp nan Mo Salah

Liverpool chuan Pathianni zan dar 8:30 hian tun season-a an league match hnuhnung ber an khel dawn a, Brentford an mikhual dawn - season tawp ruala chhuak tur Mohamed Salah tan a match hnuhnung ber tur a ni tawh.

Mahse, hetiang boruak karah hian coach Arne Slot chuan Salah a chhawr dawn leh dawn loh a sawi duh lo! Tun hnaiah Salah hian Liverpool khelh dan chu pawm dam harsa a tih thu a sawi a, social media lama a thil pholan hi coach Slot-a beihnaah tam takin an ngai.

Liverpool fans tam zawkin Salah thlawp mah se, footballer hlui tam takin Egyptian forward hi an dem a, Slot chu Brentford laka Salah hi khelhtir lo hial turin an ti!

Slot chuan, "Brentford laka ka khelhtir turte sawi ka tum lo," a ti a, Salah-a thusawi chungchang pawh sawiin, "Salah-a thusawi chungchanga ka ngaihdan hian awmzia a nei lo. A pawimawh ber chu Champions League kan inpetkai a ni a, chumi tur chuan Mo leh team pumpuite a ṭha thei ang berin ka buatsaih a ni," a ti bawk.

Dutch coach chuan sawi zawmin, "Villa lakah khan chak ta ila, Champions League khel turin kan tling mai tur a ni a, a pawi ka ti hle. Tunah chuan match khat khelh tur a la awm a, a pawimawh berah chuan Mo leh kei hian he club tana ṭha ber tur hi kan duh a ni," a ti.

Salah bakah hian Jurgen Klopp-a hnuaia player pawimawh zinga mi Andy Robertson pawhin Liverpool a chhuahsan dawn a, Reds ṭantuten Pathianni zanah club legend pahnih hi a ropui thei ang bera thlah an duh ang.