Premier League Thlirna Tawi
UCL khel turte
Premier League aṭangin Arsenal, Manchester City, Manchester United leh Aston Villa te Champions League khel turin an tling tawh. Liverpool pawh chhiar kawp danin la tling lo mah se UCL khel ngei tura ngaih an ni.
UCL-ah English club tan quota pali a awm a, tun season Europe inelnaa an chet ṭhat avangin Premier League club-in quota pakhat an neih belh. Aston Villa-in Europa League nomawi an chawi avangin quota pakhat dang neih belh dan a awm bawk.
Villa hi table-ah palinaah an awm mek a, point 62 hmuin match tawp berah Manchester City an hmachhawn dawn. Unai Emery hote hian City an hneh lo a, Liverpool-in Brentford an hneh chuan Arne Slot-a hote palina a ni ang a, Villa hi panganaah an awm thung ang.
Premier League-in quota pali an neih vang ni loin Villa hian Europa League champion an nih avangin season tharah UCL an khel thei chiah ang. Europe inelnaa English club an chet ṭhat vanga quota an neih belh chu paruknain an chang thung ang. Bournemouth leh Brighton tan Europe inelna sang ber khelh theihna kawng a la inhawng tihna a ni thei ang.
Europa League khel tur
Manchester City-in FA Cup nomawi an chawi a, Premier League-ah pahnihna an nih avangin league-a parukna bakah pasarihnain Europa League an khel thei dawn.
Tun dinhmunah Bournemouth-in UCL an la beisei bakah a chhe berah Europa League an khel dawn. Brighton leh Chelsea ten hmunruak pakhat hi an inchuh thei ang. Seagulls hian Manchester United an mikhual dawn a, Chelsea-in Sunderland an tlawh thung ang. Brentford leh Sunderland tan pawh Europa League hi la beisei ngam a ni.
Conference League khel tur
Premier League-in Euorpa League-a Aston Villa champion vanga quota pakhat a neih belh leh a nih loh chuan pariatnain Europa Conference League an khel dawn. Tun dinhmuna pariatnaa awm chu Chelsea an ni a, London club elpui tur chu Brentford leh Sunderland te an ni thei ang.
Chhiarkawp dan angin Newcastle United, Everton leh Fulham ten Blues hi la nihrual thei mah se an goal difference a inthlauh deuh tawh avangin London club chunga awm hi thil theih loh tluk a ni.