Bayern tan nomawi dang chawina hun ṭha

Bundesliga-ah Bayern Munich an champion tawh a, kar hmasa khan league nomawi an chawi tawh. Mahse Bavarians tan nomawi dang chawi theih a la awm a, zanin dar 11:30-ah Stuttgart nen DFB Pokal-ah champion tumin an inhmachhawn dawn.

Hetihlai hian Stuttgart hi champion lai an ni a, an nomawi kawl lai hi Bayern lakah awlsam taka hloh an tum dawn loh avangin inkhel hmuhnawm a beisei ngam.

An inthlau

Tun season-ah Bayern an che ṭha a, Bundesliga-ah chetsual zeuh nei mah se midang el phâk rual lohin an champion. Champions League-ah champion lai Paris St-Germain lakah vanduai zawkah ṭangin semifinal-ah an tla a, treble champion beiseina a tawp.

DFB-Pokal final an luh danah Bayern zinkawng a awlsam lo a, first round-a German third division club Wehen Wiesbaden an tum tih loh chu Bundesliga khel pha chin vek an hmachhawn a, German club lian zinga chhiar phâk RB Leipzig leh Bayer Leverkusen te an hneh bawk avangin champion an beiseina a sang khawp ang.

An hmachhawn tur Stuttgart erawh an final zinkawngah, Mainz leh Freiburg tih loh chuan Bundesliga an khel pha lo vek a, mahse semifinal-a an hneh tak Freiburg hi Europa League finalist an nih bakah, DFB-Pokal champion lai an nih avangin sawi nep theih an ni bik lo.

Stuttgart hi Europa League-ah round of 16 an thleng phâk a, Portuguese club Porto hneh loin an tla. Mahse Bundesliga-ah an che ṭhain palinaah season an khar thei a, season tharah Champions League an khel dawn.

Tute nge khel dawn?

Bayern tan veteran goalkeeper Manuel Neuer chu, a chawnah hliam tenau a neih avangina dinhmun a chiang lo a, Jonah Urbig-a'n si ban a nghah a rinawm zawk. Bavarians tan left back Alphonso Davies leh Serge Gnabry te chu hliam vanga khel lo tur chiang sa an ni bawk a, player dang erawh an dam kim thawkhat.

Tlarhma lamah Bundesliga top scorer Harry Kane, player of the season Michael Olise leh Luis Diaz te an khel thei vek dawn a, anni hi tun season Europe-a hmatawng hlauhawm berte an ni a, eng team tan pawh tum an chakawm dawn loh. Anmahni thlawp tur hian Jamal Musiala leh Joshua Kimmich te bakah, rawlthar duhawm Lennart Karl an la nei cheu.

Stuttgart tan Deniz Undav chu an innghahna a ni dawn a, German forward hian tun season Bundesliga-ah goal 19 a khung a, Harry kane chiah a tluk lo. Inelna hrang hrangah goal 25 a khung tlin avangin Bayern tlarhnung tan ven uluk bik a sual lo ang.

Undav kawppui turin Ermedin Demirovic a awm dawn bawk a, Bosnian forward hian tun season-ah goal 13 a khung tling tawh a, Undav nen an inkawp fuh hle. Midfield-ah Europe club liante awh rawn, Angelo Stiller an nei bawk a, assist vawi kua nei tawh Jamie Lewelling te an la kawl bawk a, Germany World Cup squad a tel phâk an nih avangin Bayern laka danglamna thlen turin an ṭha tawk.

Engtin zel?

Vincent Kompany-a'n league title humhim mah se UCL-ah PSG a ngam lo a, treble champion beisena a thamral bakah coaching a luh chilh hnua UCL a chawina hmasa ber tur a chu a nghah rih a la ngai.

Chuvangin Belgian coach hian a hmaa nomawi awm hi thlauh a duh tawh dawn lo a, a naute pawh nomawi duha tuihal an ni a, Stuttgart lakah hnehna chan ngei an tum dawn.

Hetihlai hian Stuttgart dinhmun a dang hret a, tun season-ah khel chhe lo mah se nomawi chawi an la nei lo. German Cup chauh hi an beisei theih a ni tawh a, kut benga season khar an duh dawn loh avangin Bayern an hlau dawn bik lo.