Dybala hma hun a chiang lo

AS Roma forward Paulo Dybala chu club hrang hrangin duh mah se, Roma-ah contract thar a ziak dawn nia sawi a awm thar a, Dybala hma hun a chiang lo zel.

Argentine forward hian June 30 thleng bak Roma-ah contract a nei tawh lo a, club hrang hrangin season tharah a thlawna lak tumin an bei. Dybala duhtu zingah Premier League club zingah duhtu a nei a, Turkey lam aṭangin sawmna a dawng bawk. An ram club Boca Juniors pawhin Dybala hi lak luh an duh.

Tun season-ah hliam vangin Dybala a inlan tam thei lo a, World Cup-ah Argentina-in an ko lo bawk a, kum 32 a nih ve tawh avangin a international career chu a tawpah a ngaih theih.

Juventus forward hlui hi a khelh mekna Roma-in chelh duh mah se, a hlawh a tihhniam a ngaih dawn a, a contract a zawh tawh mai dawn bawk avangin a chhuah theihna chance a sang.

Pathianni zan dar 12:15-ah Roma hian tun season-a an match hnuhnung ber atan Verona an lenchilh dawn a, Dybala pawh hi bul ṭan tura beisei a ni. Roma hi point 70 hmuin palinaah an awm mek a, mahse an hnuaia awm Como leh Juventus ten an la lehpel theih avangin, UCL khel turin an chak ngei ngei a ngai.