Knicks-in Cavaliers hneh nawn

NBA Conference finals khelh mekah nimin zing khan Easter Conference finals khelh a ni a, New York Knicks chuan 109-93 in Cleveland Cavaliers an hneh a, seven series game-ah 2-0 in hma an hruai a, Cavaliers an la chak ve lo.

Madison Square Garden, New York-a inkhelah Cavaliers-in bul an ṭan ṭha zawk a, James Harden leh Evan Mobley te an khel ṭha nghal a, point score lamah harsatna tawk loin 27-24 in first quarter-ah hma an hruai. Knicks tan Karl Anthony-Towns leh Josh Hart te an khel ṭha a, Cavs hmahruai fal tur an hnaih thei zel.

Second quarter-ah Knicks hmasawnna a inṭan a, Anthony-Towns leh Hart an khelh ṭhat chhunzawm bakah game 1-a point nei lo, Miles McBride-a'n team-in an mamawh lai takin a ding chhuak a, 53-49 Cavaliers hmahruaina an pawt thlain halftime an hmang.

Third quarter-ah Knicks an khel ṭha lehzual a, Jalen Brunson-a kut a kal ṭan a, Brunson hian point a score bakah a ṭhiante tan a siamsak hnem a, an dang thei meuh lo. Cavaliers erawh an inthlahdah a, Knicks defence a khawng ṭhat avangin point score an harsat a, third quarter a tawp meuh chuan 85-70 in an hnufual a, Harden-a lut tlem chu an point ngah loh chhanah a ngaih theih.

Fourth quarter-ah Cavaliers-in lehthal tumin theihtawp chhuah mah se, third quarter-a an inthlahdah an tuar. Donovan Mitchell chuan ball a chan apiangin an 'double team' avangin a che hleithei lo a, Harden leh Dennis Schröder te khel chhe lo mah se Knicks an chesual duh tawh bik lo a, a tlawm zawkah an ṭang nawn.

Knicks tan Josh Hart-a khel ṭha tluan zak a, Hart hian point 26 neiin a score hnem ber. Ani bakah hian Brunson a hmuhnawm lehpek a, American point guard hian point 19 leh assist 14 a nei. Hart leh Brunson te hi Mikal Bridges (19), Anthony-Towns (19) leh OG Anunoby (14) ten an thlawp ṭha a, game 2 an chak theih nan an thawh hlawk hle.

Cavaliers tan dan pangngaiin Mitchell leh Harden te chu an innghahna an ni a, Mobley leh Jarrett Allen ten khel chhe lo mah se, Knicks phur lai vaw dai turin point an score thei tawk lo a, game 3-ah chak an duh a nih chuan an inthlahdah a thiang tawh lo.