Pakhatna dinhmun sawh nghettu Anastasia

Mizoram Rural Bank Pro Volleyball League kal mekah Ningani zan khan, Anastasia Electric Veng chuan 25-19, 25-22, 25-21 (3-0) in Sihphir an hneh a, table-ah a sang ber an nihna an sawh nghet.

LPS Arena-ah PVL hi khelh a ni a, zaninah Hunthar leh table mawng luahtu Thutak Nunpuitu Team (TNT) te an inhmachhawn dawn a, a hmuna inkhel en man hi Rs.50 chauh a ni a, LPS Youtube channel (member only) hmangin en theih a ni bawk.

Champion lai nge nge

An match hnuhnung berah Tuichangral hmaah, vawi hnih set la hmasa zawk ni chungin Electric Veng team an tlawm a, mimalin Laldinsanga'n harsatna tawkin set hnihna atangin a vaw tla thei lo. Mahse Dinsanga'n Sihphir lakah a theihna lantir thar lehin tum 12 a hlap tla a, point nga a hloh. Net bula lehlam vuak dangtu Zosangzuala (Mama) chuan point sarih hmuin ṭum thum a tisual ve thung a, Anastasia-in Indian blocker ṭha tia hriat hlawh Kush Singh an neih belh a, vawi li Pro Volleyball Best Blocker ni zawn lai Mama nen an inkawp.

Vuak thlakah langsar thamin Anastasia chungnung bik lo mah se net bulah lehlam an veng ṭha a, mimala innghat thuk tak Sihphirin derthawng khawpin an nawr let zo lo tluan. Tuichangral an hneh loh zawh chiah avangin ṭum dang angin Electric Veng club-in rin an hlawh lo a, mahse tlo ṭha takin an inlan a, league kal meka vawi li an khelh tawhah set hloh lova an chak hmasak ber a ni.

Anastasia tan Zomuansanga, Kush Singh leh Laldinsanga'n team pum pui point hmuh 68% an hlawh chhuak a, 2024 Best Spiker Zomuana'n vawi 18 vaw tlain point sarih a hloh a, che tha chhunzawmin Kuriz Player of the Match-a thlan a ni. Karthik Madhu an chhawr zui theih loh avangin amah thlak nan Uttar Pradesh atangin feet 6 leh inchi 5-a sang Kush an la lut a, Mizorama a inkhelh hmasak berah point 14 hmuin tum riat a tisual a, a khel chhe lo.

Sihphir an bet

Set hmasa ber la chunga Hunthar an hneh loh hnuah, Sihphirin set ruk an hloh zawn mek a, khelh thumah point hnih hmuin a hniam pathum zingah Sihphir an tel a, knockout round lut pha lo dinhmunah an ding. Hmahruaitu Anastasia erawh anni aiin vawi khatin an khel tam a, point 10 hmuin semifinal an hnaih tawh hle.

Sihphir tan Niyas Abdul Salam chuan point 19 hmuin 12 a hloh a, amah thlawp thei ber Lalneihpuia Hrahsel chuan vawi sarih vaw tlain ṭum li a tisual. Set hmasa berah 14-14 a nih laiin Niyas-a'n a service dik lo a, a hnuah hlap sual bawkin lehlamin point li an hmu zawn. An kal fal hnuah Anastasia-in nghet takin hma lam an pan zel a, 24-19-a sang zawk an nih laiin Kush chuan hui tlain set an la.

Set hnihnaah Sihphirin hma sawn hret mah se Anastasia tan Zomuana a langsar zawk. Niyas chuan an inthlauhna tizimin 20-21-in an hnaih hman tihah Khawhai tlangval Zomuana'n a hnung atanga a vaw tla a, Kush chuan tha takin a service zui bawk nen point thumin Anastasia-in an kalsan.

Setter F. Lalhmingmawia chu Sihphirin thlakin captain Mesak Malsawmkima an luhtir a, inlehthal tumin thapui thawhin an bei. Neihpuia'n Kush-a vuak dansakin 11-8 in an sang a, beiseina nei hman mah se Anastasia-in point nga hmu zawnin an lehpel leh nghal.

An innghahna ber Niyas-a'n ball a hmu tam a, a zuan hnem avangin a chau tih a chet danah a hriat. A tihsual bakah lehlamin a vuak an dang fo a, team pum pui hnungtawlhin a hma aia awlsam zawkin Electric Veng club-in set thumna an la.