ADFA I Div-ah Kanan champion

Aizawl District FA hnuaia club inelna sang ber NECS I Division League final-ah Kanan FC chuan Aizawl FC Academy chu R. Swapna goal khat hmangin 1-0 a hnehin an champion.

Nimin Lammuala inkhelah Kanan FC lamin tun inelna bika goal khung hnem ber AFC (24 goals) lakah tlarhnung an remphui ṭha a, second half minute 61-naah Swapna hmangin an mamawh tawk goal an nei. Season hmasa khan team pahnih hi final-ah bawk an intawng tawh, team ṭha AFC lamin 3-1 a hnehna changin an champion - MFA Cup lamah pawh Malsawmkima naute hi an champion zui bawk.

Kuminah erawh Chawngthansanga kaihhruaina hnuaiah Kanan FC an intuai thar a, league round-ah Joseph Lalvenhima goal khat hmangin AFC hi an hneh a, nomawi inchuhna inkhelah league hmahruaitu hi goal chhuah loin an hneh nawn - champion phu ber an ni. League round match sarih an khelh hnuah a sang paliin semifinal an khel a, point hmu hniam pahnih 1st Bn MAP Academy FC leh Youngstar United FC, ITI te chu division hniam lamah an tla thla thung.