Chelsea ngam loh Rashford

Manchester United-in Marcus Rashford hoin Stamford Bridge an luhchhuah. Thawhlehni zan khan English forward hian goal hnih khungin Ole Gunnar Solskjaer hoten 2-1 in Chelsea an hneh a, Carabao Cup quarterfinal an lut.

Man United hian quarterfinal-ah Colchester United an hmachhawn dawn. League Two club Colchester United leh Solskjaer hote hi tun hmain vawi hnih an inhmachhawn tawh. FA Cup (1978-79) leh League Cup (1983-84) ah inkhel tawhin Man United hi 1-0 leh 2-0 in an chak.

Frank Lampard hoten Premier League ṭanna inkhelah Manchester United 4-0 in an hneh lo a, hemi hnuah hian nasa takin an insiamṭha. United-in League Cup khel tura Stamford Bridge an lenluh takah chuan Blues-in phuba an lak ngei rin a ni.

Chelsea hia Burnley hnehtu aṭangin player paruk zet an thlak a, hattrick siamtu Christian Pulisic-a'n bul a ṭan nawn thung. Solskjaer erawhin an chak kal tluang lai chhunzawm tumin player thlak bawk mah se team ṭha an lutah a ngaih theih. Tlarhnungah khawvel defender manto ber Harry Maguire an chhawr a, an goal nawrna pahnih Daniel James leh Rashford ten bul an ṭan bawk.

Manchester United-in bul ṭan ṭhain Scott McTominay-a'n goal a khung teuh a, Blues defender Marcos Alonso-a'n a ball hloh chang leh turin tlan let ṭha mah se Daniel James a tihtluk vangin penalty a chawi. Minute 25-naah Rashford rawn pen chhuakin keeper Willy Caballero a bum.

Second half-ah Michy Batshuayi rawn langin Belgian striker hian Caballero ball pet chhuah chu Maguire a 'flick' khum hnuah ṭha zeta lalutin kawh zetin goal kilah tak a khung. Match hnuhnung pasariha chak vek Chelsea an phur thar hle.

Amaherawhchu Old Trafford-a Chelsea ngam loh Rashford bawk Stamford Bridge-ah a rawn langsar a, United forward hian yard 30 zeta hla aṭangin freekick a pet goal. Inkhelh banah Ole Gunnar Solskjaer-a'n Cristiano Ronaldo freekick nen a khaikhin a, hei hian goal luh dan a sawifiah ṭha hle.

Norwegian manager Ole Gunnar Solskjaer chuan, "Cristiano ang mai a ni. Kan naua hi chuan thinlung khauh ṭha tak a nei a, penalty pet turin timna a nei lo. Tichuan hun tawp hmain ball a la a, a duh dan taka petin min chakpui," tiin goal hnih khungtu Rashford a fak hle.

Penalty khung hi thil pangngai a ni thei a, chutihrualin United tan erawh tun dinhmunah a harsa. Rashford ringawt pawhin tun season-ah vawi hnih a hlah tawh a, nasa zawka mualpho thei dinhmunah ding mah se a tihtur a ṭhulh phah lo - Chelsea lakah 'hero' a ni.

Chelsea boss Frank Lampard chuan, "Player ṭhahnem tak kan thlak a, goal ni loa kan khelh dan hrim hrim kan thlir chuan kan khel ṭha zawk. Chak turah kan inngai hman a, mah se an goal khung a 

ṭha em a, tih theih kan nei lo a ni," tiin an vanduai thu a sawi.