Indian Super League a hmuhnawm

Kartawp ISL inkhelah Indian club ṭhaten inkhel hmuhnawm min phochhuah sak a, Zirtawpni zan khan Bengaluru FC chuan 2-1 in FC Goa an hneh. 

Sree Kanteerava Stadium, Bangalore-a inkhelah mualneitu club tan Sunil Chhetri chuan goal hnih a khung a, India captain ropui zanah FC Goa tana Hugo Boumous goal khungin awmzia a  nei  lo. 

Chhetri hian minute 59-naah goal hmahruai a khung a, Goan club-in French-Moroccan attacking midfielder Boumous hmangin chhanglet mah se Chhetri hian hun tawp nan minute ruk chauh a awm tawh tihah chakna goal a khung ve leh a ni. 

Inrinni zan ISL-ah Mumbai City chuan ATK an mikhual a, Kolkata club hian table chung ber luah turin Mumbai club hi 2-0 in an hneh. ATK tan Pronay Halder leh Michael Soosairaj ten goal khat ve ve an khung a, Manchester City nena inzawm hlim Mumbai lamin a chhanletna tur an nei lo.