MBA Junior C'ship 2026 a hlawhtling

Yonex Sunrise PC Gabriel Lalliansanga Memorial MBA Junior Championship 2026 chu May 19 -23, 2026 chhung khan hlawhtling takin Ramhlun Indoor Stadium-ah neih a ni. Inelnaah hian lawmmanah Rs 1,11,900 sem ral a ni a, tournament sponsor-tu PC Lallawmsanga, IPS Retd chuan a tel zawng zawng hnenah thilpek a pek vek bawk.

Chaltlang Badminton Club aiawh Vanlalhruaia Sailo leh New Serchhip Badminton Club player Lalruatkimi te an telna zawng zawngah champion-in an triple crown a, tun ṭum inelnaah an langsar dun hle. Tun ṭum inlenaah hian Chaltlang BC leh New Serchhip BC player-te category pasarih ve ve ah an champion thei a ni.

Triple Crown

U19 boys singles-ah Vanlalhruaia Sailo hian Remruatkima Kulikawn BC hnehin a champion a; U19 boys doubles-ah Isak Vanlalhmangaiha, New Serchhip BC nen an inkawp a, U19 mixed doubles-ah H. Lalrinhlui, Chaltlang BC nen inkawpin doubles inelna pahnihah hian a champion ve ve.

Vanlalhruaia Sailo hi ITM Academy, Raipur-a training lai mek a ni a, Tata Trusts/Neida te nena thawhhona kal zela training niin kumin hi under 19-a a inlan hmasak ber niin nakkum lamah pawh U19 category-ah la inlan thei dawn.

Lalruatkimi hian under 11 leh under 13-ah singles title a la ve ve a, U13 doubles-ah Rosalyn Remlalmuani nen inkawpin a champion bawk. Triple crown a nih theih nan a coach Tluanga leh a pa Lalremruata te an pawimawh hle.

Result dang

Chaltlang BC aiawh H. Lalrinhlui chuan U19 mixed doubles a lak bakah girls singles U19 title a la a, Lalruattluanga Tlau, NSBC chuan U17 boys singles leh boys doubles title lain category pahnihah an champion ve ve.

Zoramthari, Sihphir BC chuan U17 Girls Singles title a la a, U19 mixed doubles leh U19 girls singles final-ah a vanduai ve ve thung. Under 15 hmeichhiaah T. Lalmuanpuii,Chhinga Veng BC-in singles a lak bakah doubles-ah Lalṭhakimi, NSBC nen inkawpin an champion bawk.

Under 15 boys lamah K. Liansangzela'n (CTBC) singles a lak bakah doubles-ah V. Lalhmingmuanpuia, CTBC nena inkawpin an champion bawk. Under 13-ah Mark C. Lalrinsanga, Saron Veng BC chu singles-ah a champion a, Lalmalsawma Lianhna leh Zothanpuia Chhangte, MVBA ten boys doubles title an la thung. Under 11 boys singles-ah Mark C. Lalrinsanga, Saron Veng BC a champion ve bawk.