Kane hattrick hmangin Bayern champion

Bundesliga champion Bayern Munich chuan nomawi dang an chawi belh leh a, Inrinni zan khan DFB-Pokal final-ah Stuttgart chu 3-0 a hnehin an champion a, tun season-a nomawi pahnih an chawina chiah a ni.

Bayern tan an goal khung khawl Harry Kane-a'n second half-ah hattrick a siam a, Stuttgart-in a chhanletna tur an nei ve lo.

Inkhel chu

Olympiastadion Berlin-a inkhelah Stuttgart an hlauhawm hmasa zawk a, Maximilian Mittelstadt chuan ṭan aṭanga reiloteah goal ban a pet per nghal. Mittelstadt-a hlauhawm chhunzawm a, a ball pet ṭha tak chu Bayern keeper Jonas Urbig-a'n a dansak a, Bayern an him hlauh.

Bayern pawhin Kane leh Josip Stanisic ten chance nei mah se Stuttgart keeper Alexander Nubel an paltlang thei lo. Team pahnihte innawr tawn zak zak mah se a hmawr an bawk fuh thei lo a, first half-ah goal a lut lo.

Kane-a show

Second half-ah erawh Bayern an danglam a, inkhel an thunun nghal. Minute 55-naah Michael Olise cross chu Kane-a'n hnai tak aṭangin a tauh lut a, Bayern hma a hruaipui. An hmahruaina goal-ah Bundesliga player of the season Olise thiamzia a lang a, Stuttgart defender ten Kane an veng ṭha tawk lo bawk.

Minute 80-naah Kane-a'n goal a khung belh a, Luiz Diaz-a ball pek chu a inherpui hnuah mawi takin a khung a, an hmahruaina a belhchhah. Hun tawp hma hretin Olise penalty hlawhchhuah chu English forward hian a lungthu kim nan a khung leh a, hun a tawp zui nghal avangin nuamsa takin Bayern an champion.

Kane a bawn

Tun season-ah Kane a khel ṭha a, inelna hrang hrangah match 50 khelin goal 60 a khung tling chiah. Bundesliga-ah goal 36 a khung a, league dang chhiar telin amah hnaih berttu Manchester City forward, Erling Haaland chuan goal 27 a khung a, Kane-a'n golden boot a dawng dawn.

Kum 32 mi Kane hian August 2023-a Bayern a zawm hnuah chet chhiat a nei meuh lo a, German Cup-ah Bavarians a champion pui leh tak avangin, Bayern a zawm hnuah nomawi pali a chawina chiah a ni a, nomawi chawi duh vanga Germany pantu forward hian a tifuh hle.

Bavarians coach Vincent Kompany chuan, "kan khingpuite an ṭha a, first half-ah phei kha chuan an khelh ṭhat avangin min barakhaih hman hle. Mahse, goal kan chhuah loh avangin kan vannei a, second half-ah kan insiamṭha thei hlauh a, a tlawm zawk kan ni hman teuh hlein ka hria," a ti.