A vawi khat nan Thutak Nunpuitu Team an chak

Mizoram Rural Bank Pro Volleyball League khelh mekah Inrinni zan khan, table mawngphaha awm Thutak Nunpuitu Team chuan 25-20, 22-25, 25-20, 19-25, 15-11 (3-2) in Hunthar an hneh a, tun season-a an vawi khat chakna a ni.

LPS Arena, Falkland-ah PVL hi khelh niin, zaninah hmahruaitu Anastasia Electric Veng leh Chhinga Veng Spikers te an inhmachhawn dawn. Inkhel hi a hmunah Rs 50 chauhin a en theih a, LPS YouTube channel-ah (member only) a en theih bawk.

TNT an tho

Set hmasa berah Muanna Veng team-in vuak vak aiin a awla dah tumin point an zawng nasa a, lehlam vuak dan tumin an zuang taima bawk. Hunthar tan hlap tlak a awlsam bik lo a, lehlam khelh dan zuiin net chung atangin an hui hnem a, 19-19 a nih laiin TNT hmahruai nan Hriata'n a vaw tla a, mipui thawm a ṭha hle.

Chawl mai loin Muanna Veng club ṭantuten thawm an nei zui zel a, Fabian Lallunghnem-a'n hui tlak ve nghal a tum laiin point a hloh. Hun pawimawhah TNT an hriam a, Lalsaitluanga leh C. Lalhriatpuia'n hlap tla zawnin 23-20-in an sang a, Huntharin dang thei loin Suryansh chuan a vaw sual zawn.

Inkhel boruak a nung zui a, set an hloh hnuah Hunthar insang mar leh zualin 16-16 a nih hnuah TNT-in point thum an hloh zawn. Mahse TNT-in hnual lovin an nawr let leh a, Hriat leh Rohlua an inlar bakah Dinchhunga'n tawn hriat a neih a chhawr bawk. 24-20-a sang zawk an nih laiin Biakmuana'n Faka service a la sual leh a, Huntharin set an hloh.

Set nganaah mipui puihna hmangin TNT-in ṭan hmun an siam ṭha a, Hriata'n a hnung atanga a hlap tlak hnuah Suryansh chuan a vaw kai lo. Huntharin point li an hloh zawn rualin TNT-in 7-3-in hma an hruai a, hawi kir tawh loin 14-11 a nih laiin Dinchhunga'n chakna point a thawk chhuak. League kal meka vawi li an khelh tawhah a ṭum khat nan an chak a, team satliah lo Hunthar an hneh rualin LPS Arena chhungah TNT fans au thawm ring hle.

Hunthar an chesual

Season liam ta khan vawi thum champion tawh Hunthar hi a hniam ber ni chungin an tla a, champion team-a tel tawh an player hlui hming langsar ko kirin Uttar Pradesh atangin Suryansh Tomar an la lut bawk a, an khelh hmasak vawi hnihah chiang takin an chak zawn a, a vawi li nan champion thei turin kawng dik an zawh.

Mahse TNT lakah tawnhriat nei tha leh a boruaka chiai lo ber tura ngaih, Huntharin an khelh tawh dan an pha lo a, talbuai zawkah ṭangin point hloh, service dik loh leh lak sual an ngah hle. Huntharin an beisei loh thil tawngin zir belh tur nei chungin khelmual an chhuahsan a, May 27-ah tunhnaia khel ṭha Tuichangral an hmachhawn dawn.