Cavaliers hnehtu Knicks dinhmun a ṭha

NBA Conference finals khelh mekah nimin zing khan, New York Knicks chuan 121-108 in Cleveland Cavaliers an hneh a, seven game series-ah 3-0 in hma an hruai a, NBA Finals khel turin match khat chak chiah an mamawh tawh.

Rocket Arena, Cleveland-a inkhelah Knicks-in bul an ṭan ṭha zawk a, Karl Anthony-Towns, Mikal Bridges leh Landry Shamet te kut a kal nghal avangin 37-27 in first quarter-ah hma an hruai.

Second quarter-ah Cavaliers-in hma an sawn hret a, James Harden, Donovan Mitchell leh Jarrett Allen te hmangin thawhchhuah an tum a, point 27 thawk chhuakin 60-54 in an inthlauhna an tihniam.

Third quarter-ah Knicks an chungnung zawk a, Anthony-Towns, Bridges leh OG Anunoby te hmangin an hmahruaina an tizau zel. Cavaliers erawh an inthlahdah a, holam takin ball an hloh nasa a, Knicks-in an tihsualah an hrem zel avangin 91-82 in hma an hruai.

Fourth quarter-ah inlehthal tumin Cavaliers an ṭang a, mahse Knicks tan Brunson, Shamet leh Anunoby te an ngam lo a, Mitchell leh Mobley ten an point hmangin an team an chawk phur zo lo a, a vawi thum nan an tlawm.

A zawna vawi thum an chak loh avangin Cavaliers dinhmun a him lo a, match khat an tlawm leh chuan an tla tawh dawn a, tlang tur chuan an chetsual a thiang tawh lo.

Inkhel dangah Inrinni zing khan champion lai Oklahoma City Thunder chuan 123-108 in San Antonio Spurs an hneh a, 2-1 in hma an hruai. OKC tan MVP Shai Gilgeous-Alexander a langsar a, point 26 leh assist 12 neiin double double a siam a, OKC champion nawnpui turin kawng dik a zawh mek.