Lewandowski-a'n goal nen Barca a thlah

La Liga champion Barcelona chuan Inrinni zan khan, tun season-a an match hnuhnung ber an khel a, season tawpa chhuak tur Robert Lewandowski chuan goal khat khungin, a chhuahsan tur club a thlah liam.

Lewy-a'n goal khung mah se Barca chak nan a tawk lo a, Valencia tan Javi Guerra, Luis Rioja leh Guido Rodriguez te hmangin an lehthal a, khualmualah an tlawm.

Champion tawh mah se an ṭhat theih dan berin Barca an inlan a, goal erawh an khung thei lawk lo. First half-ah Alejandro Balde leh Lewy ten chance nei mah se, goal ban tihper nan an hmang ve ve. Mualneitu Valencia pawhin Barca keeper Joan Garcia an paltlang thei lo a, first half-ah goal a lut lo.

Second half-ah Barca-in an zia an chhuah a, dan pangngaiin ball an chang hnem. Minute 60-naah Ferran Torres-a pet kawh tak chu Lewy-a'n hnai tak aṭangin a lo tawk lut a, an hmahruaina goal a khung. Catalan club tan a match hnuhnung berah goal a khung avangin Lewy bakah a teammate te an lawm a, mahse an lawm chhung a rei lo.

Barca lawm phur lai pawh a reh hmain Valencia tan Guerra-a'n an siphurh sutna goal a khung a, Barca an hawihai. Valencia-in an la duhtawk mai lo a, minute nga hnu lawkah Rioja-a'n goal khung belhin a team hma a hruaipui. Hun tawp dawnah Rodriguez-a'n khung belhin an chak nemnghehna goal a khung.

Inkhelh zawh hnuah erawh Lewandowski a langsar ber a, Bayern Munich forward hlui hian Barca fans hmaah kut bengin a kal kual a, Barca fans te pawhin ding chunga kut bengin Lewy zahna an lantir. Barca chhuahsan mai tawh tur Lewy hian goal nen a club thlah mah se, a chakpui zawh loh avangin a lawm a kim lo ang.

Kum 37 mi Lewandowski hian 2022-a Barca a zawm hnuah, match 193 khelin goal 120 a khung a, season li chhung chauha tih atan chuan a ropui. Lewy hi Barca chanchina goal khung hnem 11-naah a inhlangkai a, Neymar, Ronaldinho, Thierry Henry, Ronaldo leh Johan Cruyff te chungah a awm.

Lewy hi Barca hnua a club thar tur a la chiang lo a, Serie A lamah sawmtu nei mah se amah berin Europe-a khelh chhunzawm tumna a nei lian lo tih a sawi tawh. Major League Soccer bakah Saudi Arabia lam aṭangin sawmtu a nei bawk a, a hma hun a la chiang lo.