Player lungawi lohna karah French Open an ṭan

Grand Slam inelna French Open chu May 23, Inrinniah khelh ṭan a ni a, player langsarten sum tam zawk dawn an phut avangin Zirtawpni press conference-ah lungawi lohna an lantir.

Grand Slam Open prize money-ah hian chawhrualin pawisa lut aṭanga 15% chauh dah a ni a, Zirtawpnia player langsarten media an hmachhawn ṭumah pawh minute 15 chauh hun an hmang.

Player aiawhte chuan hun rei tak lungawi lohna kaltir an tum lo tih an sawi a, French Tennis Federation (FFT) nen inbiakna nei tawhin kalphung pangngaia press conference nei chhunzawm tura ngaih an ni.

Chutihrualin player aiawhte hian All England Club (AELTC) leh US Tennis Association te an la dawr dawn a, hei hi an kal zelna turah a pawimawh ang. June 11, 2026 hian AELTC chuan Wimbledon-a lawmman tur an puang dawn a, hetah hian player-te phut a hlawhtlin leh tlin loh a chiang ang.

Player-te hian inelna sum lakluh aṭanga 16% lawmmana kal turin an phut. Nikum khan Wimbledon-ah £427mtd lakluh anga ngaih a ni a, player-te pawisa phut zat hi £70mtd bawr vel a ni ang. Kum 2025 khan prize money kha 53.5mtd a ni a, 34% vela tih pun an beisei tihna a ni thei bawk.

Player-te hian Grand Slam tinah inelna buatsaihtute chu player hlawknaah $4mtd (£2.98mtd) chhunglut turin an beisei bawk a, June 28-a Wimbledon ṭan hunah an beisei angte a hlawhtlin loh chuan nasa zawka lungawi lohna an lantir a rinawm.

Nizan khan mipa lamah Novak Djokovic a inlan a, result kan hre hman lo. Vawiin lamah hmeichhe seeded no. 1 Aryna Sabalenka leh seeded no. 2 Elena Rybakina te an inlan ang.