Mexico-ah Iran an innghat dawn

Iranian FA president Mehdi Taj chuan World Cup atana inpuahchahna chu United States-ah ni loin Mexico-ah FIFA-in an sawn sak thu a sawi. FIFA lamin thuchhuah hi la nei lo mah se Mehdi Taj sawi danin Iran hian Mexican ramria awm khua Tijuana-ah training an nei ang.

Iran hi World Cup atana an inbuatsaihna atan Tucson, Arizona-ah innghat tura tih an ni a, mahse Middle East lama indo vangin an hmalam hun a chiang lo a, inelna hmachhawn thei lo tur hiala sawi an ni. Tunah erawh an tel dawn tih a chiang tawh a, khelmual pawn boruak vangin an chanchinin ngaihven a hlawh chho zel ang.

Taj chuan, "World Cup-a tel tur innghahna hi FIFA-in a pawmpui zel a ngai. Istanbul-a FIFA leh World Cup official aiawhte inhmuhkhawmna bakah Zirtawpni khan webinar kaltlangin FIFA secretary general Swede Mattias Grafstrom te nen meeting neih a ni. Heta hian kan innghahna chu US aṭanga Mexico-a sawn turin kan ngen a, vanneihthlak takin min pawmsak," tiin a sawi.

Iran hi group G-ah New Zealand (June 16), Belgium (June 21 zan) leh Egypt (June 27)-ah an inhmachhawn ho. World Cup atan Iran hian inbuatsaihna hi an ṭan tawh a, Turkey chhim lam khua Antalya-ah inbuatsaihna an nei mek.