Congress party chu a tho chhuak leh mek - Lal Thanhawla
Mizoram Pradesh Congress Committee (MPCC) president Lal Thanhawla chuan, Congress party chu a tho chhuak leh mek nia sawiin, Sinlung Hills Council (SHC) inthlanpui neih turah pawh tlin ngei an inbeisei thu a sawi.
Lal Thanhawla hian nimin khan Congress Bhavan-a inkhawmah thu sawiin, Congress party chu an tho chhuah leh mek avangin Maharashtra leh Haryana state legislative inthlanpuiah pawh Congress party-in nasa takin hma an sawn tih a sawi a, "BJP-in an tâlbuai phah hle. BJP sorkarah Indian economy nasa takin a tlahniam mek a, mithiam tam tak an mangang a, PM hlui Manmohan Singh ruai turin BJP sorkar thuràwn an pe hial a ni," a ti.
November 5-a SHC inthlan tur chungchang sawiin Lal Thanhawla chuan, "Sinlung Hills area-a chêng mipuite hian remna siamtu Congress party laka lawmthu sawi nan Congress leh a thawhpuite candidate an thlan tlin ngei ka beisei," a ti. BJP kaihhruai sorkar laipuiin Jammu & Kashmir laka thuneihna a lek dan te, Parliament ráwn loa Article 370 an paih duh dante enin, Mizote leh hnam tênau dangte chu BJP thuneihna hnuaiah dinhmun hlauhawm taka an din mek thu a sawi bawk.
MPCC vice president H Liansailova pawhin thu sawiin, contract a la dil ngai lo a, a la thawk lo tih sawiin, "Contract leh therhlo ringawt beisei nana politician-te min hmu ṭhin hi siamṭhat a ngai," a ti a; Mizorama ruihhlo hluar lutuk te, zu khap a ni chunga a tam reng te, sum leh paia harsatna awm mek te, HIV pung chak lutukte chu kohhrante nen ṭang ruala siamṭhat a ngaih thu a sawi.
H Liansailova chuan, Congress party chu Mizoram tan Pathianin a hmang ṭangkai tawh ṭhin tih sawiin, "Mizorama remna meichher chhitu, remna atana lalṭhutthleng kiantu kan nih bakah, Mizorama hmasawnna lian tham leh ngêlnghet zawng zawng Congress kutchhuak deuh vek a ni. Finance management leh hnam inpumkhatna chungchangah Congress hian a thawh hlâwk hle. Congress party lungphùm, a thil tum leh ideology zawng zawng hi a Pathian thu em em a ni," a ti.
Report petu MPCC Media secretary C Lalhriatpuia chuan, MBSE office sakna tura Congress sorkar laia cheng nuai 1,000 dah tawh leh tender hmanga contractor thlan vek tawh, contractor-te pawhin security deposit pea agreement an ziah tawh, a lung pawh phûm vek tawh chu chhuanlam siam chawpin MNF sorkarin an cancel tih a tarlang a, "Hei hi Education Minister-in amah leh a lamhnaite inhaivûrna atan hman a tum nia a lan avangin uluk takin kan vil reng dawn a ni," tiin a sawi.