Tute nge Europe-ah inlan dawn?

Premier League team 20 aṭangin Wolverhampton Wanderers, Burnley leh West Ham te chu Championship-ah an tla a, hetihrual hian club pariatin season tharah European football an khel dawn thung.

Arsenal, Manchester City, Manchester United, Aston Villa leh Liverpool-ten season tharah Champions League an khel dawn a, Villa-in City hneha palina an nih avangin parukna Bournemouth tan Champions League beiseina a bo thung.

Villa hi Europa League champion an nih avangin UCL khel tura tling sa an ni a, pangana ni se chuan, parukna Bournemouth-in pangana pual UCL hi changin, UCL khel phak tur an ni.

Mahse, palina an ni a, palina hi European Performance Spots (EPS) kaltlanga an spot chan a nih loh avangin, parukna Cherries tan UCL khelh beisei theih a ni lo - Europa League an khel ang.

FA Cup champion City-in UCL an khelh dawn avangin pasarihna Sunderland chuan Europa League-ah hmun an chang a, pariatna Brighton & Hove Albion-in Europa Conference League an khel dawn.

Premier League hian Europe-ah club an la neih belh thei - Nilaini zan dar 12:30-ah Crystal Palace chuan Europa Conference League final an khel dawn a, Rayo Vallecano an hneh chuan season tharah Europa League an khel ang.