Premier League khel zel tur Spurs

Tottenham Hotspur chuan Pathianni zan khan 1-0 in Everton an hneh a, season tharah Premier League an khelh chhunzawm dawn. West Ham chuan 3-0 in Leeds United hneh ve mah se, Spurs an chak avangin an inhamtang thei tawh lo.

Spurs-in hnehna an chan avangin point 41 an nei a, Hammers hian hnehna chang ve tho mah se, point 39 hmuin, Tottenham chu point hnihin an phak lo a, season tharah chuan Championship an khel dawn.

Tottenham tan hian Joao Palhinha chuan minute 43-naah inkhela goal awmchhun a khung a, hun pawimawh takah hnehna an chan avangin Spurs an him.

London club-in EPL an khelh chhunzawm dawn avangin an hlim a, "EPL kan khel zel dawn," tiin an zai. Mahse, season hmasa lawka Europa League nomawi chawitu club ṭantu tan lawm a kim lo.

Premier League Big Six an tih zinga mi hial ni mah se, relegation 'fight' an ngai hi hlawhchhamna a tling. Spurs fans ṭhenkhat chuan stadium-ah banner kengin, "Hlawhtlinna tiamtuten hlawhchhamna min thlen a, ENIC chhuak rawh se," tih a inziak.

Spurs ṭantute hian club neitu ENIC Group chu chhuak turin an duh tihna a ni a, an hlawhtling kher ang em, a hriat loh.

Tottenham manager Roberto de Zerbi chuan, "Ka player-te khelh danah ka lawmin ka hlim takzet a, mi ṭha leh player ṭha an nihzia an pholang. Ka ngaihdanah chuan Spurs ka zawm hnua kan khelh ṭhat ber a ni hial ang.

"David Moyes-a enkawl Everton kan hmachhawn a, West Ham-in EPL an khelh zel theih nana puih pawh a duh ngei ang. A ti thei ta lo erawh pawi ka tihpui hle," a ti zui a, chak mah se, chak lote a tawrhpui.