Europe-a inlan lo tur Chelsea

Season thara Xabi Alonso hoa inlan tur Chelsea chuan season tharah European football an khel dawn lo - Pathianni zan khan Blues hian an mikhualna ramah Sunderland chu 2-1 in an ngam lo a, Europa League an khel dawn lo.

Sunderland hian 2-0 in hma an hruai hman hial zawk. Black Cats tan hian Trai Hume chuan goal hmahruai khungin, Malo Gusto chuan an lamah a tilut zui a, Stadium of Light-ah Chelsea an hawihai.

Blues tan Cole Palmer chuan minute 66-naah si phurh sut ṭhen mah se, minute ruk hnuah Wesley Fofana chu red card pek a ni a, player kim loa an khelh zui avangin an tan thawhleh a harsa tawh.

FA Cup-ah Manchester City an champion avangin, champion lawmman 'Europa League khelh phak' chu Premier League-a pasarihna chanvo a ni zui a, Sunderland hi pasarihna an nih avangin Europa League an khel dawn.

Black Cats hi Premier League kai thar an ni a, EPL an kai thar season-ah European football khel turin an inpetkai nghal tihna a ni a, a pui rem rem hle - kum 53 hnua European football an khelh hmasak ber tur a ni.

Sunderland hi an vannei tel ve bawk - Chelsea an hneh bakah, Brighton & Hove Albion an tlawm a, Brentford an chak zo lo bawk a, club pahnih chak zawh loh laia an chak avangin pasarihna an ni ta daih.