Conte-a'n Napoli chhuahsan dawn

Napoli manager Antonio Conte chuan tun nipuiah Napoli a chhuahsan tur thu a tichiang a, Napoli-ah season khat daih contract la nei mah se, Conte-a'n Napoli enkawl chhunzawm a tum lo.

Pathianni zan khan Napoli hian tun season Serie A-a an match hnuhnung ber atan, Udinese chu Rasmus Hojlund-a goal hmangin 1-0 in an hneh a, season tharah Champions League an khel dawn.

Inkhelh banah Conte chuan, "Helai hmuna ka hun chu a lo tawp dawn ta. Thla hmasa khan club chairman nen kan inbe tawh a, keima thutlukna a ni a, engmah inhmuh thiamlohna a a awm lo," a ti.

Conte hian buaina a awm lo ti mah se, January khan player lut chungchangah club hotute chungah a lungawi lohna a lo tilang tawh a, Conte chuan, "Helai hmunah hian hlawhchhamna pakhat ka nei a, huatna leh thikna boruak awm sa aṭangin mimal tinte kan insuihkhawmtir thei lo a ni.

Thil eng pawh zalen leh nuam taka i tih theih tawh loh chinah chuan i hmabak chu tlukchhiat a ni mai," tiin a lo sawi tawh. Mahse hei hi a chhuah chhan a ni em tih a hriat loh.

Kum 56 mi Conte hian 2024 khan Napoli a zawm a, a season khatnaah Serie A title a lakpui nghal. Tun season-ah erawh Conte naute hliamin a tlakbuak a, pahnihna niin champion Inter Milan chu point 11-in an pha lo. UCL-ah pawh knockout stage an thleng pha lo.

Italian manager hian an ram team enkawl tura rinkai ber a ni tih chanchinbuten an ziak a, mahse amah Conte berin Pep Guardiola rawih a duh ber thu a sawi a, Italy enkawl a tum hmel loh. Hetihlai hian Napoli chu Conte thlak turin an coach hlui, Maurizio Sarri leh AC Milan coach Massimiliano Allegri te nen sawizawm an ni.