Djokovic-a'n chakin bul a ṭan

French Open first round-ah Novak Djokovic chuan world number 83 Giovanni Mpetshi Perricard chu set hmasa ber 5-7 in hloh mah se 7-5, 6-1, 6-4 a set thum lain hnehna a chang. Serbian tennis star hian Roland Garros-ah match 22 chhung first round-ah hneh loh an tawng tawh lo.

Djokovic hian kar liam ta Zirtawpni khan kum 39 a tling a, Grand Slam 25-na lak ngei tumin Paris pan mah se kuminah singles match 11 chauh a la khelh avangin a hriam tawk lo. Clay-ah phei chuan Rome Masters-ah match khat chauh a khel a, Dino Prizmic hneh loin a tla.

Tennis chanchina player ropui ber zinga mi Djokovic hian 6ft 7in-a sang Perricard service leh forehand na tak lakah a buai a, hun pawimawh a thiam thil a lantir lo bawk. May 27, Nilaini hian Djokovic hian second round-ah Valentin Royer a hmachhawn dawn a, hmabak hautak erawh a la ni lo.

Vawiin hian seeded no. 1 Jannik Sinner a inlan dawn a, Italian tennis star hian Clement Tabur a hmachhawn dawn. Tun ṭum inelnaa hian champion lai Carlos Alcaraz chu ban rek hliam vangin a inlan thei lo a, Spanish tennis star hi Wimbledon-ah pawh a inlan dawn. World no. 1 Sinner tan dinhmun sawhnghet theihna hun ṭha a ni ang.