Antonelli khum thei an awm lo

Formula 1 season kal mekah Andrea Kimi Antonelli a langsar zel a, Mercedes driver hian Pathianni zan khan Canadian Grand Prix-ah hnehna a chang leh a, a zawna vawi li pakhatna a ni chiah. Antonelli hnungah Ferrari driver Lewis Hamilton a thleng a, pathumnaah Red Bull driver Max Verstappen a thleng bawk.

Circuit Gilles Villeneuve-a intlansiakah Antonelli a che ṭha tluan zak a, pakhatna nih a phu hle. Tun season-ah Antonelli a che ṭha a, Australian GP tih lohah chuan pakhatna ala ni thei vek a, podium lawn loh a nei lo bawk.

Hetihlai hian a teammate George Russel chu lap 30-na an tlan laiin a car a chhia a, a tlan chhunzawm ve thei lo. Tun hnaia chanchin ngah tak Russell hi a car chhiat lai hian hmahruatu a ni a, dinhmun ṭha taka a awm laia a tlan chhunzawm theih loh avangin Antonelli nen an inthlauhna a zau sawt.

Tun season ṭan dawnah Russell a phur a, FIA-in dan thar a duan chu sawiseltu awm mah se a duhtu zinga mi a ni. British driver hi inelna hmasa ber Australian Grand Prix-ah a chak nghal a, Chinese GP-ah pahnihna a ni bawk. Mahse hemi hnu hian Russell a tlahniam hret a, race pahnih a hmachhawn hnuah palina ve ve niin podium a lawn pha lo.

A teammate kum 19 mi Antonelli erawh a san zel avangin, Russell chungah beisei a sang lo thei lo a, hetiang boruak karah hian tun hnaia chanchin ngah tak, Red Bull driver Max Verstappen chu Russell thlak turin Mercedes-in an duh nia sawi a awm bawk.

Kum 28 mi Russell erawhin chhuah a duh thu a la sawi lo a, a teammate Antonelli nen an inkarah pawh boruak ṭha lo a awm lo niin a sawi bawk. Mahse Russell hi a chet ṭhat chhunzawm loh chuan Mercedes-ah a nghet reng dawn bik lo.

Russell ang bawka ngaihven hlawh Verstappen chu tun season-a podium a lawn vawi khatna a ni a, FIA-in dan thar an duan hnua lungawi lo Verstappen a tlan ṭha a, a chunga awm Hamilton nen second 10 vel chauhin an inthlau. Palinaah Charles Leclerc thlengin Ferrari driver pahnih inkarah Verstappen a awm.

McLaren erawhin beisei an pha lo a, Oscar Piastri chuan 10-na a ni a, a thleng hnuhnung zawk Lando Norris chu lap 40-naah, a car gearbox lamah chiang lo a awm avangin a tlan chhunzawm thei lo bawk. Norris-a'n point a hmuh loh avangin table-ah a tlahniam a, Hamilton-a'n a lehpelin a teammate Piastri chu parukna a ni bawk.