Wemby hoin Spurs an tho leh nghal

NBA Conference Finals khelh mekah San Antonio Spurs chu, game 3-ah chak lo mah se an innghahna Victor Wembanyama hoin an tho leh nghal a, nimin zing khan 103-82 a Oklahoma City Thunder hnehin an chak a, seven game series-ah 2-2 in an inhnehtawk chiah.

Frost Bank Center, San Antonio-a inkhelah ṭan aṭangin Wemby a khel ṭha nghal a, point score a awlsam bakah a defence ṭhat zia a tilang tel. Wemby bakah Stephon Castle leh Devin Vassell te an khel ṭha a, 28-19 in first quarter-ah hma an hruai a, an inthlauh san ber laiin point 15 a ni hman hial.

Second quarter-ah thil a danglam tam lo a, defence-ah Thunder-in hma an sawn hret. Awlsan taka point score tir an nei meuh lo a, mahse anmahni zawkin point score an harsat thung a, match hmasa lama khel ṭha tak Alex Caruso chuan point a nei thei lo a, 50-38 in chawlhlawk an hmang.

Third quarter-ah pawh Spurs bawk a chungnung zawkah an ṭang a, Wemby hoin Castle leh Vassell te an inlar a, an khingpuite ball an chhuhsak ngun a, OKC-in an tihsual vuak let an tuar zo lo. quarter tawp dawnah Kenrich Williams-a three points hmangin an inthlau lutuk tur an hliam khuh hram a, 78-60 in Spurs-in hma an hruai zel.

Fourth quarter-ah pawh OKC an insiamṭha thei chuang lo a, point mamawh zawkin ball an hloh nasat bakah, MVP Shai Gilgeous-Alexander chu an thlawp ṭha tawk lo. Isaiah Joe rawn nung thar viau mah se an inthlauhna tam tawh avangin awmzia a awm thui lo. Spurs tan Castle leh Wemby an khel ṭha tluan zak a, De'Aaron Fox a che vel chu sawi hmaih theih a ni lo bawk a, OKC-in an ngam lo a, a tlawm zawkah an ṭan a ngai.

Thunder tan hliam vanga khel lo Jalen Williams leh Ajay Mitchell te awm loh a langsar a, OKC hian 33% chauh an field goal an nei a, three points pawh vawi 33-ah vawi ruk chauh an lut a, 18.2% chauh a ni. Vawi 17 ngawt ball an hloh bawkin, season hmasaa an defence ṭhat vanga fak hlawh team an ni tih a hriat loh.

Game 5-ah erawh Thunder hian Williams an chhawr theih an inbeisei a, Mitchell erawh game 5-a a inlan theih nan hun a la tlem deuh mai thei. Team pahnihte hi May 27, Nilaini hian an inhmachhawn leh dawn a, a chak zawk tan dinhmun ṭha zawka awm theihna a nih avangin, vawi khat chak lo a pawi tawh dawn.