AIFF-in Bagan a bei let

Mohun Bagan-in Unity Cup atana koh an player pariat an ko kir a, India rama football thuneitu sang ber All India Football Federation an lungawi lo hle.

Bagan hian player an koh kir chhan chu, international break ni loa ram tana inlan an rem tih loh vang a nih thu an sawi a, an inhliamin club-in inenkawlna senso a chawi a ngai leh ṭhin niin an sawi.

Club-te hian international break-ah player an chhuah ngei ngei ngai mah se, international break lo laia koh an nih erawh chuan, chhuahtir lo turin zalenna an nei thung.

AIFF deputy secretary general M Satyanarayan chuan, "Bagan-in AIFF hnenah player an inhliama mawhphur tura an ngenna kan chhang lo anga an sawi hi dawt a ni a, eng lehkha mah kan dawng lo.

"AIFF hian April 10 aṭang khan player kan kohte khelhna club-te chu lehkha vaswi li ngawt kan thawn," a ti a, "National team, senior leh age level thlenga player inhliam enkawl nan, 2025-26 season chhungin nuai 15 kan hmang," tiin, ram tana player an inhliamin a enkawl nan AIFF-in pawisa a tum zel thu a sawi zui.

M Satyanarayan chuan, "Bagan hian a dawn hnaiah bak engmah sawi an nei lo a, player-te pawhin camp an zawm vek tawh. Mahse, camp an zawm hnu lawkah London-a kal lo turin, player WhatsApp group hmanga hriattir an ni a, anni pawhin hrehawm an ti hle," a ti.

AIFF Director of National Teams Subrata Paul pawhin Bagan chet dan hi demin, "April 10-ah engkim hriattir tawh an ni a, an che tlai hret a ni," a ti a, Bagan chet dan chuan player-te rilru a tihhnual thu a sawi.

India keeper hlui Subrata Paul chuan sawi zawmin, " CAFA Nations Cup leh U23 national team-ah khan hetiang harsatna hi kan lo tawk tawh bawk. Hetiang harsatna hi tawh tawh loh kan duh a, ram tana inlan duh player-ten an tuar ringawt hi a fuh lo," a ti a, Bagan a dem ve bawk.