Kan tan chona a ni - LZa

India-in Jamaica an hmachhawn dawn a, an hmachhawn tur ram hian European football-a inlan player an kawl nual - India tan a harsa dawn tih a chiang a, Mizo forward Lallianzuala Chhangte erawh a phur zawk.

LZa chuan, "Kan huphurh lo a, kan tan chuan phurawm tak a ni zawk. Team ṭha hmachhawnna remchang kan nei thei hi kan tan chona a ni a, phur takin kan khel ang," tiin Vanglaini a hrilh.

Lunglei tlangval chuan, "Duh angin squad kim lo mah se, training kan nei ṭha thei viau. Hetihrual hian hun kan nei tlem a, training vak ai chuan recovery hi kan tan a pawimawh rih ber.

"Player 18 chauh ni rih mah ila, coach pawhin siamrem tumin theihtawp a chhuah a, Pathian zarah kan beisei ang ngeia kan khelhchhuah theih ka beisei," a ti a, Jamaica lakah result ṭha hlawhchhuah ngei an tum.

LZa chuan, "Ṭawngṭainaah kan inhre reng dawn nia," a ti a, India tan result ṭha hlawhchhuah ngei tumin a inlan dawn.

A tlan chak em avanga Mizo Flash hminglem an pek LZa hian season hman zawh takah khan league match 13 chukhel vekin, goal li a khung a, Mumbai City tan captain nih a tlinzia a pholang.

Mizo forward hian ram tan match 51-ah goal kua a khung tawh - tuna India squad-ah ani aia India tana inlan tam chu Gurpreet Singh Sandhu (84) leh Sandesh Jhingan (72) te chiah an ni.