James leh Diaz telna Colombia

Colombia chuan World Cup squad an puang a, captain James Rodriguez chu damlohna avangin buai mah se, squad-ah telh a ni - Bayern Munich chhuanvawr Luis Diaz a tel bawk.

Real Madrid leh Bayern Munich tan pawha lo khel tawh James hi Major League Soccer club Minnesota United tana khel mekin, tun season-ah damlohna avangin minute 194 chiah khelmualah hun a la hmang!

March international break-ah khan Colombia chuan 3-1 a France ngam loin, he inkhelah hian James pawh a inlan. Mahse, inkhelh zawh lamah damlohna avanga enkawl chhunzawm niin, ni thum zet chu a inenkawl nia sawi a ni.

US media-te chuan natna hlauhawm tak 'rhabdomyolysis' a vei niin an tarlang a, mahse, a club khelhna Minnesota chuan an pha thung. Tunah chuan World Cup meuh khel tura koh a ni a, ram tan a inlan theih a beisei ang.

Colombia tan James ai mah chuan Luis Diaz chu innghahna tur ber a ni tawh dawn. Bayern Munich forward hian season duhawm tak hmangin, Bayern tan inelna hrang hrangah match 51 khelin, goal 26 a khung a, assist vawi 23 a nei bawk!

Kum 29 mi forward bakah hian Colombia hian Luis Suarez an kawl bawk. Sporting Lisbon striker hian Portuguese club tan inelna hrang hrangah match 53 khelin goal 38 a khung a, assist vawi kua a nei.

Galatasaray centre back Davinson Sánchez leh Crystal Palace right back Daniel Munoz te chu Colombia-in player lansgar dang an kawl a ni a, Real Betis tana match 39-a goal 15 khungtu Cucho Hernández pawh ngaihthah a thiang

lo ang.

Colombia hi Group K-ah awmin, a vawi khat nana World Cup khel tur Uzbekistan chu June 17-a an match hmasa berah an hmachhawn ang a, DR Congo leh Portugal an hmachhawn zui leh dawn bawk.