Monfils-a'n hun tawp a hmang

French Open first round-ah Gael Monfils-a'n Hugo Dellien a hmachhawn a, French tennis star hian Roland Garros-a inlan hnuhnun berah 6-2, 6-3, 3-6, 2-6, 6-0 in an chak lo.

Kum 39 mi Monfils hian tun season zawhah tennis a chawlhsan tur thu a puang tawh a, kum 2008-a semifinal a luh tawhna French Open-ah ṭantu a ngah hle.

Nimin inkhelah Monfils hian set hmasa pahnih a hloh nghal a, mahse theihtawp chhuaha rawn ṭang lehin set hnih a rawn la a, set tawp berah erawh ṭang tur a awm tawh lo.

Inkhelh zawhah big screen aṭangin Rafael Nadal, Roger Federer, Novak Djokovic bakah French mi French Open-a champion hnuhnung ber ten thlahna thu an sawi.

Monfils-a nupui Elina Svitolina erawhin first round-ah hnehna a chang a, vawiin hian seeded number pasarihna hian Spanish player Kaitlin Quevedo a hmachhawn ang.

Svitolina chuan a pasal Monfils chu nuam ti taka French Open hnuhnung ber khel turin a fuih a, Monfils-a chhungten a inkhel hi a ṭawiawm bawk.

Monfils hi a thlen san lai berin world number 6 a ni a, ATP title 13 lain chung zingah ATP 500 nomawi pathum a tel. French tennis star hian French Open bakah US Open-ah semifinal a thleng tawh bawk.