Tlan tluan lo mah se Russell-a'n nuam a ti

Canadian Grand Prix neih zawh takah, George Russell chuan a car chhiat vangin tlan tluan thei lo mah se, a teammate Andrea Kimi Antonelli nen an inelna chu nuam a tih thua sawi.

Circuit Gilles Villeneuve, Montreal-a inelnaah hian, Mercedes driver pahnih Russell leh Antonelli te chuan inlehpel tawn zak zakin hma an inhruai chhawk a, mahse lap 30-naah Russell a vanduai avangin inelna a hmachhawn chhunzawm thei lo. Antonelli erawh pakhatna niin a zawna vawi li a chakna a ni thung.

Kum 28 mi Russell chuan, "Antonelli nen kan inel dan kha nuam ka ti a, a ropui ka ti hle. Kum eng emaw zat chu khatiang inelna kha ka hmachhawn tawh lo. Driver dangah pawh hmuh tur a vang tawh a, 2014 Bahrain GP-a Lewis Hamilton leh Nico Rosberg te kha a hnuhnung ber an ni hial mai thei.

Tunah chuan a hma aia ṭha car kan nei tawh a, midangin eng vanga car thar hi duh lo nge an nih ka hrethiam lo. Antonelli nen Australia, China leh Canada-ah te kan inel a, hetiang thlen theih chhan chu kan engine thar vang a ni. Driver te zingah inelna dang pawh a la rawn chhuah ngei ka ring," a ti.

Tun season ṭan dawnah Russell a phur a, FIA-in dan thar a duan chu sawiseltu awm mah se a duhtu zinga mi a ni. British driver hi inelna hmasa ber Australian Grand Prix-ah a chak nghal a, Chinese GP-ah pahnihna a ni bawk. Mahse hemi hnu hian Russell a tlahniam hret a, race pahnih a hmachhawn hnuah palina ve ve niin podium a lawn pha lo.

A teammate kum 19 mi Antonelli erawh a san zel avangin, Russell chungah beisei a sang lo thei lo a, hetiang boruak karah hian tun hnaia chanchin ngah tak, Red Bull driver Max Verstappen chu Russell thlak turin Mercedes-in an duh nia sawi a awm bawk.

Russell erawhin chhuah a duh thu a la sawi lo a, a teammate Antonelli nen an inkarah pawh boruak ṭha lo a awm lo niin a sawi bawk. Mahse Russell hi a chet ṭhat chhunzawm loh chuan Mercedes-ah a nghet reng bik lo ang.