Pre quarterfinal-ah Mizoram chak lo

76th Junior National Championship 2026-ah Mizoram team-in pre quarterfinal thlengin level 2 aṭangin level 1-ah inhlangkai mah se Thawhlehni zan khan Chandigarh 78-61 a hneh loin an tla. Inelna hi Puducherry, Tamil Nadu-ah neih a ni.

Mizoram hi Andaman & Nicobar Island, Jammu & Kashmir , Jharkhand leh West Bengal te nen group khatah an awm. May 22, Zirtawpni khan Mizoramin Andaman & Nicobar Island 103-9 a sawpin bul an ṭan a, Inrinniah J&K lakah 67-45 in hnehna an chang leh bawk.

May 24, Pathianiah Mizoramin team ṭha Jharkhand 91-88 in an hneh a, match tawp berah West Bengal lakah 74-72 in vanduai mah se an khingpui dangte an hneh vek avangin pool champion an ni ta tho. Knockout stage hmasa berah Mizoram Chhattisgarh 80-74 in an hneh a, pre quaterfinal-ah Chandigarh hmachhawnin 78-61 in an vanduai ta thung.

Tun ṭumah hian Mount Carmel School, Aizawl ten Mizoram ai an awh a, an tum ram thleng pha lo mah se level 1 an kai phak avangin Mizoram an ti hming ṭha hle.