Patidar-a'n RCB final a thlenpui

Indian Premier League qualifier 1-ah champion lai Royal Challengers Bengaluru chuan Gujarat Titans run 92 a hnehin final an lut. RCB tan captain Rajat Patidar-a'n ball 33 lekah run 93 an siam a, hnehna an channa kawngah a pawimawh hle.

Titans erawh chak lo mah se qualifier 2-ah nizana Sunrisers Hyderabad leh Rajasthan Royals inkhela chak zawk an hmachhawn leh dawn a, final luh theihna kawng a la inhawng. Qualifier 2 hi May 29, Zirtawpniah khelh tur a ni a, final hi May 31, Pathiannia khelh tur a ni.

HPCA Stadium, Dharamshala-a inkhelah Titans-in vawm hmasak an thlang a, RCB lamin bat hmasain bul an ṭan chhe lo. Virat Kohli-a'n run 43 a siam a, bul a ṭanpui Venkatesh Iyer-a'n run 19 siamin Devdutt Padikkal-a'n run 30 a siam bawk.

Patidar-a luh hnuah inkhel kalhmang a dang a, RCB captain hian ball 33 lekah six runs vawi kua a vua a, four runs vawi nga vaw bawkin thi loin run 93 a siam tling hial. Champion lai hian run 254 an siam avangin chak turin an dinhmun a ṭha a, Gujarat Titans tan target a sang mah mah.

Titans top order-ah che ṭha an awm lo a, Rahul Tewatia-a'n run 68 a siam zarah an mualpho lutuk tur chu a ziaawm deuh. Shubman Gill-a hote hi over 19.3-ah run 162 siamin an thi fai vek a, an chak lohna zat pawh run 92 a ni.