England-a manager ṭha ber Lampard

Premier League-a Coventry City kaipuitu Frank Lampard chu League Managers Association manager of the year atan thlan a ni a, he award dawng tura a khum zingah, Premier League-a Arsenal champion puitu Mikel Arteta a tel.

English football-a manager-ten an vote hmanga an pek ṭhin, LMA manager of the year award hi Sir Alex Ferguson award tih a ni a, England manager Thomas Tuchel chuan Lampard-a hnenah hian a hlan.

Manchester United coach ropui ṭhin Sir Alex chuan, "Coventry hian football hmuhnawm tak pho chhuakin, an inringtawk em em a, en nuam ka ti ṭhin hle. Premier League season thar atan duhsakna sang ber ka hlan a che u," tiin Lampard hi duhsakna a hlan.

Derby County, Everton leh Chelsea pawh lo enkawl tawhtu Lampard hian Coventry hi Championship-ah point 11 ngawta san fal pui chungin, EPL-ah a kirpui a, 2000-01 season hnua top flight league an khelh leh hmasak ber tur a ni ang.

Lampard hian Championship manager ṭha ber award a dawng tel a, kum 22 hnua Arsenal tana league nomawi chawitu Mikel Arteta chuan Premier League manager of the yeard lawmman a dawng.

Chelsea legend Lampard hian Sir Alex Ferguson award dawng tur hian Arteta bakah Keith Andrews (Brentford), Unai Emery (Aston Villa), Andoni Iraola (Bournemouth), Pep Guardiola (Manchester City), Michael Skubala (Lincoln City) leh Andy Woodman (Bromley) te a khum.

Hmeichhe lamah Women's Super League-a Manchester City champion puitu Andree Jeglertz chu WSL coach of the year atan thlan a ni.