Ghana squad-ah Partey a tel

Arsenal midfielder hlui Thomas Partey chu Ghana World Cup preliminary squad-ah koh a ni a, kum 32 mi midfielder hian pawngsual thubuai nei mek mah se, an ram hian World Cup atan an ko ta tho.

Partey thubuai hi chinfel a la ni lo a, tunah hian hmeichhe hrang hrang paliin thubuai an thehluh ang chuan, pawngsuala puhna thubuai pasarih leh mawi lo taka hmeichhe laka chet avanga thubuai pakhat a nei - Partey hian puh a nihna zawng zawng hi a pha thung.

Mahse, a thubuai hi nakkuma ngaihtuah tura tih a nih avangin Partey hi tunah chuan a zalen rih a, La Liga club Villarreal tana khel midfielder hian World Cup a khel dawn tihna a ni.

Ghana tan vawi 58 inlana goal 16 khungtu Partey hian season hmasa khan Arsenal-a a contract a hmang zo a, London club nen hian contract thar chungchanga an inrem theih loh avangin a chhuak.

Partey hian Gunners a chhuahsan hnu lawkah thubuai nei mah se, La Liga club Villarreal chuan free transfer-in an la lut a, season hman zawh takah khan Spanish club tan hian inelna hrang hrangah match 32 a khel.

Ghana boss Carlos Queiroz-a player koh zingah Manchester City forward Antoine Semenyo a tel a, Premier League kai thar Coventry City striker Brandon Thomas-Asante a tel bawk.

Ghana hi group L-ah England, Croatia leh Panama te nen an awm ho a, a awlsam lo khawp ang!