Sihphirin TNT an vaw tla

Mizoram Rural Bank Pro Volleyball League khelh mekah Thawhlehni zan khan, Sihphir chuan Thutak Nunpuitu Team chu 25-22, 25-20, 25-21 (3-0) in an hneh a, TNT hian match khat khelh tur la nei mah se knockout round an lut thei tawh lo.

LPS Arena, Falkland-ah PVL hi khelh a ni a, Sihphir hian zaninah Khawbel an hmachhawn leh nghal dawn. A hmuna inkhel en man hi Rs.50 chauh a ni a, LPS YouTube channel (member only)-ah a en theih bawk.

Niyas leh Sihphir

Sihphirin hriam takin inkhel bul an ṭan nghal a, Niyas Abdul Salam chuan ball a hmuh hmasak vawi li hlap tla vekin, team a tiphur. Lalramhluna'n tihsual nei loin a vuak hmasak ṭum liah point a hlawh chhuak vek bawk a, TNT lakah 20-11-in Sihphir an sang.

TNT-in bei letin, 20-23 in an hnaih hman a, mahse, Sihphir tan Niyas chuan an mamawh point hnih vaw chhuakin set a lakpui.

Set hmasa ber la chungin Hunthar hmaah Sihphir an zuih ral tawh a, set hnihnaah TNT an kalsan mai theih loh avangin an ze ngai an chhuah leh dawnin a lang hman. Mahse an inum chhoh laiin Hriata'n kawng hawnsakin a vaw sual a, Dinchhunga'n a hlap tlak hnuah 19-20-in lehlam hmahruaina tizim mah se Albert-a'n Hriata vuak a dansak hnuah Sihphirin point thum an hmu zawn a, point ngaa inthlau chungin set an la zawn.

TNT-in set lak tumin bei zui mah se inthlahdah loin Sihphir an khawng tlat a, Niyas chauh ni loin, Mizo player-ten inringtawk takin an hmabak an hlen a, ball vuak leh lehlam hlap dang kawngah TNT-in an khing hneh lo. Ramhluna'n a hlap tlak hnuah Hriata'n chhang let thei loin a vaw sual a, 12-7-in Sihphir an sang a, an inthlauhna humhimin, Niyas chuan Sihphir point hnuhnung pali a hlawh chhuak a, 25-21-in an tlang.

TNT an chuai

Inrinni khan Hunthar nen set nga an inkhelh hnuah, rin hlawh lo zawk TNT-in hnehna hlu tak sual chhuakin harh tharna chang mah se, an tinung zui thei lo. Player an inchet ṭhat chhawk avangin insiam rem chawp zel a ngai a, TNT hniam zawk chhanah a ngaih theih. Vawi nga an khelh tawhah point hnih chiah an hmu a, khelmual kotlanga thlawptu nei ṭha leh mipui ko khawm hnem thei ber TNT-in league match khat la nei mah se, 2019 hnua a vawi khat nan semifinal lut pha loin an tla dawn.

Mizo hlanga khel TNT-in Sihphir innghahna Niyas an dan hneh loh avangin team pahnih inkar a zauh phah a, Kerala aṭanga an lakluh Niyas chuan point 26 hmuin 11 a hloh a, league kal mekah a vawi hnih nan Kuriz Player of the Match lawmman a dawng.

Nikumah kai thar Sihphirin set thum fai thoin TNT an hneh tawh a, Niyas chuan point 40 chuang hmuin, khel ṭha bera thlan a ni a, an intawn vawi hnihnaah danglamna siamtu a ni leh.

Sihphir erawh Hmeichhe zinga Pro Volleyball mipa team enkawl hmasa ber, Lalhmingliani Sailo hnuaia an khelh ṭhat ber leh vawi hnih an chakna a ni a, Zaninah an elpui mek Khawbel nen an intawng dawn a, knockout round lut turin beiseina sang tak an nei.