Dembele leh Hakimi ten training zawm

French champion Paris St-Germain player pawimawh pahnih, Ousmane Dembele leh Achraf Hakimi te chu hliam vanga an chawlh hnuah team training an zawm leh tawh a, May 30, Inrinni zana khelh tur Champions League final khelh an tum hle.

Dembele hian Ligue 1 match hnuhnung bera Paris FC nen an inkhelh ṭumin a chawn ding lam a tina a, minute 26-na lekah Goncalo Ramos-a'n a thlak. Coach Luis Enrique-'n French forward hliam hi a serious loh thu sawi mah se, PSG fans hlauhthawnna a reh phah lo a, UCL final a khelh theih loh an hlau.

Hakimi erawh UCL semifinal first leg-a Bayern Munich an hmachhawn ṭum khan, hun tawp lamah a malpuiah hliam a tuar a, second leg pawh a khel thei lo, Ligue 1 match hnuhnung ber an khelh thlengin a inlan leh tawh lo.

PSG squad a chhah ṭhat avangin an rinrawl pahnih hi awm lo mah se harsatna an tawk lo a, mahse UCL final meuha an awm lo tur chu fans-in an ngai ngam lo. Ballon d' Or kawltu Dembele leh Morocco captain ten training an zawm leh tak avangin anmahni ṭantute an thaw huai ang.

Luis Enrique hote hi Champions League nomawi kawltu an ni a, tun season-ah pawh team hmuhnawm ber zinga mi an ni. An nomawi kawl lai hi Arsenal-in chhuhsak an tum dawn a, PSG-in Enrique hoa humhim an lo tum ve thung dawn.