Southampton player hlui Udoh a thi

Southampton forward hlui Victor Udoh chu Abuja, Nigeria-ah thia hmuh a ni a, a thih chhan hi chiang taka hriat theih la ni lo mah se, a thil ei sual vang emaw a zu in a taksain a tuar loh vang niin police te chuan an sawi.

Kum 21 mi Udoh hi Czech Republic club Dynamo Ceske Budejovice-ah a khel mek a, season an hman zawh tawh avangin an ramah a let leh lai tak a ni. A thih hma zanah pawh hian a ṭhiante nen an lengchhuak lai hmutu pawh an awm a, a tuk zingah kaihthawh theih a ni tawh lo.

Udoh hian an ram club Hypebuzz FC-ah bul ṭanin, 2023 khan Belgian club Royal Antwerp academy a zawm a, a khelh ṭhat avangin senior team-ah hlankai nghal a ni. Antwerp-ah kum hnih a awm hnuah Saints-in February 2025 khan an la lut.

Saints academy tan thla ruk a khelh hnuah, club nen inhriatthiam tawnnain a contract an titawp a, Czech club Dynamo Ceske Budejovicea a zawm leh a, a khelh hnuhnun berna tur a ni.

Southampton chuan, "Kan player hlui kum 21 mi Victor Udoh thihna avang hian pawi kan tiin kan rilru a na hle. He hun harsa takah hian Victor-a chhungte leh a hmangaihte chu kan thinlung takin kan tawrhpui a ni," tiin thuchhuah an siam a, a club hlui Royal Antwerp pawhin Udoh an ui thu an tarlang ve bawk.