Spurs hnehtu OKC dinhmun a ṭha

NBA Conference Finals khelh mekah nimin zing khan, Oklahoma City Thunder chuan 127-114 in San Antonio Spurs an hneh a, seven game series-ah 3-2 a hmahruaiin Western Conference champion ni turin an dinhmun a ṭha tawh hle.

Paycom Center, Oklahoma-a inkhelah Spurs-in bul an ṭan ṭha a, mahse Thunder-in na taka an nawr chhunzawm hnuah hma an hruai let a, an kut a kal nghal avangin 29-27 in first quarter an la. Second quarter-ah Spurs-in hma an sawn a, an phur hman hle. Mahse OKC-in MVP Shai Gilgeous-Alexander an nei a, SGA luh hnuah OKC an chungnung zawk a, 69-58 a hmahruai chungin halftime an hmang.

Third quarter-ah OKC bawk an hmuhnawm a, SGA bakah Jared McCain a inlar a, point 23 zetin an inthlau hman. Mahse Spurs an hnual phah lo a, Julian Champagnie, Keldon Johnson te a hma aia nasain an ṭang a, first half-a langsar lo tak Victor Wembanyama a inlar ṭan bakah Stephon Castle leh Devin Vassell te three points hmangin an invawrh kâng leh hret.

Mahse, Thunder kut kal lai a tawp bik lo a, match hmasaa point nei lo Alex Caruso a khel ṭha a, three points hmangin a chhang let zel thei a, Spurs phur zual a vaw dai. Spurs-in point score lamah hma sawn mah se OKC an inthlahdah bik loh avangin 101-91 in third quarter-ah an hmahruaina an chhunzawm.

Fourth quarter-ah Spurs-in theihtawpin an bei let a, De'Aaron Fox leh Castle ten an team chhan tumin point an nei zawn nghal a, mahse OKC tan Isaiah Hartenstein-a'n a chhan let theih zel avangin an hnaih thei lo a, harsatna tawk loin game 5-ah OKC an chak.

Game 5-ah an chak zawh loh avangin Spurs dinhmun a derthawng a, match hnih chak an mamawh bakah match khat an chak lo leh a nih chuan an zinkawng a tawp tawh dawn. Spurs tan an innghahna Wemby-a'n point 20 nei mah se zan dang a pha lo a, Spurs hi Western Conference champion nih an duh chuan Wemby a khelh ṭhat a ngai.