Vawiinah Inter Branch TT hmawr bawkna

LBS Suzuki 6th Inter Branch Table Tennis Tournament neih mek chu vawiin hian MTTA Hall, Mission Vengah a hmawrbawkna neih a ni dawn. Chawhma dar 10:00 aṭangin inelna ṭan a ni dawn a, mipa leh hmeichhe singles bakah team inelnaah semifinal leh final khel tur a la awm.

Inelna hnuhnung bera Mission Veng champion puitu Jeho Himnakulhpuingheta'n Chawngte P tan a rawn inlan a, ani hi India ram pum mipa singles number 9 ni lai a nih avangin a khel hi hmuhnawm tham a ni. TT thiam bik Jeho elpui thei ber tur chu inelna hnuhnung ber final-a hneh Mission Veng tlangval Alberto LR. Ruata a ni dawn. Jeho leh a ṭhianpa Alberto te hi final-a an inhmachhawn a nih ngat chuan TT ngainatute tan hmaih phal chi a ni lo ang.

Hmeichhe singles semifinal-ah Mizoram women’s singles champion lai Caroline Malsawmkimi (Lungdai) leh SAI, Bolpur Table Tennis Academy-a awm mek Lalrinpuii (Vaivakawn) te an insu dawn. Semifinal pakhat zawkah UTT Mizoram Table Tennis Academy-a awm mek Hmingsangmawii (Mission Vengthlang) leh SAI, Bolpur TT Academy-a awm mek Lalmuanzeli (Vaivakawn) te an inkhel dawn a, inkhel en châkawm ve ve a ni.

Chanchin buatsaih laiin team inelnaa semifinal lut kan hre hman lo. Vawiin hian team championship neih zawhah tlai dar 4:00-ah closing function neih a ni ang a, mipa leh hmeichhe final khelh zui a ni ang.