Vawiinah BR Studio MFA Futsal Final

BR Studio MFA Inter School, Veteran leh Division One Futsal Tournament 2026 final chu vawiin hian R. Dengṭhuama Stadium, Mualpuiah khelh a ni dawn. Chhun lamah school inelna neih a ni ang a, zan lamah veteran leh division 1 final khelh a ni ang. Inkhel hi BR Studio YouTube channel-ah a en theih.

School inelnaah hian category pali an awm a, category pahnihah Neuhof School-in final an lut a, final lut dang team parukte chu Springfield HSS, Candid English School, Home Missions School, St. James School, Mount Carmel HSS leh Golden Harvest HSS te an ni. School inelna a ni miau a, entu an ṭhahnem dawn.

Veteran lamah tun hma player ṭha ṭhin an inlan dawn. Nutmeg FC-ah S. Malsawmtluanga, Jerry Zirsanga leh Vanlalrova te an awm a, Manuna Memorial lamah Mizoramin Santosh Trophy an champion ṭuma vice captain V. Lalṭanpuia te an awm. Inkhel en châkawm tak a ni.

Division 1 final-ah futsal inelna uar chhoh ṭantirh aṭanga team indin tawh Zarkawt Mustang leh tun hnaia team ṭha ber zinga mi Zuangtui club Reuben FC te an inkhel dawn. Futsal game class sang tak a beisei theih ang.