Player-ten theihtawp an chhuah a, zah an phu - Mizoram coach

Swami Vivekananda U-20 Men’s National Football Championship final-ah Mizoramin Nilaini tlai khan Kerala an hmachhawn a, 2-0 in hma hruai mah se Kerala hian 4-2 in an lehthal. Mizoram coach Lalrindika Hmar chuan player-te chhanin theihtawp an chhuah avanga zah an phu thu a sawi.

RK Ashram Ground 1, Narainpur, Chhattisgarh-a inkhelah Mizoramin Mesak C. Lalrinngheta leh Vanlalramnghaka te hmangin first half-ah goal an khung a, Kerala-in second half-ah Sheril Shaji Thomas goal hnih bakah Ajith leh Shamel te goal hmangin an chhanglet.

Mizoram coach Rindika chuan, "Hahchawlhna hun nei ṭha zawk kan ni a, kha kha kan hman ṭangkai kan beisei hle. Mahse khua kha a lum em em a, first half-ah khan khawlum kha kan tuar hman viau, water break awm khan tlemin min ti harh deuh. A nihna takah chuan player ṭhenkhat kha first half-ah khan an zo tih a hriat. Second half ṭan atang khan in au phur thei pawh kan awm meuh lo," tiin khawlum vanga harsatna an tawh thu a sawi.

Player-te chhan zuiin Rindika chuan, "Final vawi hnih kan khel tawh a, 2-0 a hma hruai tawh hnuah kan chak lo ve ve. Player-te thiam loh engmah a awm lo a, an theihtawp ram tan an hlan a, zah an phu. Dem tur leh mawhphurtu chu keimah coach ka ni a. Mawhphurhna zawng zawng ka la a ni," tiin Vanglaini a hrilh.

Inkhel chungchang sawiin Rindika chuan, "Kerala hi team ṭha tak an ni a, an midfield an ṭha a, ball kangah keini aiin sang mah se an ṭha vak bik lo tih kan hria a, long ball pet tir hram hram kan tum a. Mahse ground ball luh an tum ve ngar ngar si a, shooting chance pe lo turin theihtawp kan chhuah a, first half-ah chuan kan tum kan hlen thei. Dressing room-ah pawh shooting chance pe lo a hnaih ran hram hram dan tur nen lam kan lo sawi ho a, kan hum zo ta ngang lo a ni," tiin a sawi a, nakkum lamah coaching staff thar nen duhsakna a hlan nghal bawk.