Aizawl FC-in Nagaland tlawh dawn

NorthEast aṭanga I League champion thei awmchhun Aizawl FC chuan Football For Peace and Development Initiative Project an siam a, a bul ṭan nan Nagaland an tlawh dawn. Nimin khan Aizawl FC-in Dimapur an pan a, ni 10 chhung an cham ang.

Mizo club hian June 2, Thawhlehni chawhnu dar 2:00-ah MON XI nen Pangting Astro Turf, Mon Village-ah an inkhel ang a; June 6, Inrinniah Chumoukedima Football Ground, Dimapu-ah an inkhel leh dawn.

Aizawl FC manager F. Lalrinmawia chuan, "Indian Football League-ah kan theihtawk leh phak tawk kan chhuah a. Kan duh ang points hmuchhuak thei loin relegation round te khelin kar hnih vel Hyderabad khaw lumah kan inkulh a. Pathian zarah relegate loin season kan hmang leh thei a. Kan lawm tlang hle a. Kan president te aṭang pawhin pressure in pe miah lo fuihna ṭawngkam hriat nuam tak tak nen kan hmachhawn," tiin president Robert Romawia Royte leh club hotu dangte chungah lawmthu a sawi.

F-a chuan sawi chhuznawmin, "Kan President-in football leh a club a hmangaih zia lantir nan, keini a staff leh player-te pawh min duhsakna lantir nan Nagaland sorkar te nen hetiang hun ṭha min siamsak leh te hi kan lawmin kan phur hle. Football for Peace Initiative tih ni mahse, match hnih kan han khelh turah hian chak result ve ve nei turin theihtawpin kan inbuatsaih chhunzawm nghal a. Nagaland ah Football Game mawi tak hmuhtir ngei kan tum e," tiin result ṭha tak neih an tum thu a sawi.