Silly Point: Terminator

TATA IPL 2026 kharna hapta thawnthu a ngaihnawm zual zel a. Qualifier 1 leh Eliminator 1-ah inkhelin sawp tak ve ve kan hmu a, ka rin phak loh thil a ni.

Royal Challengers Bengaluru-in Gujarat Titans sawpin final an lut a, eliminator round-ah Rajasthan Royals-in Sunrisers Hyderabad sawpin qualifier 2-ah an inhlangkai bawk. Zanin dar 7:30 hian Rajasthan leh Titans ten final khel tur an zawng dawn.

Champion nawn kalkawng

Kumin IPL-ah hian RCB te hian an nomawi an humhim ang tia lo sawi lawk awm se, league stage chanve aṭang kha chuan ka pawisa neih za a za ka thap ngam ngei ang a, a ni ka rin ang ngeiin an zinkawng a tluang hle rih a nih hi.

Gujarat Titans-ten an fielding nawi rah an seng a. Ground fielding lama runs chhuah ut ut piah lamah Rajat Patidar a ball vuak an man ṭhelh a pawi vawng vawng. RCB bowling discipline tak Jacob Duffy leh Bhuvneshwar Kumar te kha Gujarat Titans run 250 chuang um tan an ṭha mah mah a ni ber e.

Hasta La Vista Hyderabad

Eliminator 1 inkhelah tun season-a chhuk leh chho kawng zawh nasa ber team SRH leh RR te an intum a. He team pahnih intluk lohna chu Rajasthan lamin rawlthar kum 15 mi Terminator 'Sooryavanshi' an kawl.

A ni, he Bihar rawlthar hian ama kut liau liauin Rajasthan Royals a chakpui kan ti thei ang. Jofra Archer-a ball vawm ṭha lutuk kha SRH ho kuang kilhna perek lian nghet chi mai a ni e.

Final khel tur zawnna

Chandigarh khaw pawn Tira, Punjab-a PCA Stadium-ah zanin hian Gujarat Titans leh Rajasthan Royals ten final lut turin an inkhuainuai dawn.

Tun IPL league stage lamah ṭum hnih inhmachhawnin, ṭum khat ve ve an lo inhneh dun tawh a. Zanin zet zawng team thawhhona piah lamah, superstar rawn pen chhuak an awm vaih chuan danglamna thlentu an ni leh ngei ang le.