Champion tum Hunthar an tlu rei lo

Mizoram Rural Bank Pro Volleyball League-ah Nilaini zan khan Hunthar chuan 25-23, 25-19, 23-25, 25-21 (3-1) in Tuichangral an hneh a, an match hnuhnung berah chak lo mah se, title chuhtu zingah an tel reng tih an lantir.

PVL hi LPS Arena, Falkland-ah khelh a ni a, zaninah Tuichangral hian Chhinga Veng Spiker an hmachhawn leh nghal dawn. A hmuna inkhel en man hi Rs.50 chauh a ni a, LPS Yotube channel (member only)-ah a en theih bawk.

Hunthar an tho

Inkhel tir lamah Tuichangral tan Mahela Indeewar chuan lehlam tihbuai phak lohin sang tak aṭangin a vaw tla a, set khatna laihawl thlengin team tan beiseina a siamsak. Hunthar insiamṭha hretin, Suryansh Tomar leh Lalbiakmuana'n an vuak tlak hnuah Lalbiakmawia Khiangte chuan Lalrinpuia hlap a dansak a, 20-20-in an nih rual.

Fabian Lallunghnema'n-a'n Hunthar tan a hlap tlak hnuah Saidingpuia Sailo vuak a dansak leh a, point khat hmuh belha set la thei turin 24-22-in an kalsan. Dang thei turin Mahela chuan hun ṭha ṭum hnih a nei zawn a, a hmasa zawk vaw tla mah se a hnuhnung zawkah a hlap kai lo.

Set hnihnaah Hunthar an ṭha lehzualin a chungnung zawkah an ṭang a, tawnhriat nei ṭha Remsangzuala'n (Lalmama) ṭha taka a vawrh bakah a hui tla tel bawk a, 13-13 aṭangin ball vuak tlak leh lehlam hlap dan kawngah Tuichangralin an tluk lo.

Set thumnaah erawh Tuichangral an insiamṭha hret a, ṭha takin Mahela leh Saitea an inthlawp. Rinpuia'n lehlam hlap a dang hnem a, a ball hmuh point-ah a chantir thei bawk. 22-22 a nih hnuah Mahela leh Saitea ten an vaw tla zawn a, set khatna an hloh dan ang chiahin an la a, au thawm a ring hle.

Tuichangralin Hunthar lehthal tura beiseina an neih laiin an innghahna Mahela chuan beisei a pha lo zui a, a ball hlap a nat loh bakah a tir lam angin a zuan a zang lo va, vuak tlak a harsat. Huntharin erawh an phur a reh lo a, tlak hniam nei loin mar takin an khel a, set thum la thei tura 18-12-a an kal fal hnuah phu takin set lina an la.

Hunthar captain Lalmama chuan team pahnih inkarah danglamna a thlen a, team khai khawmtu a nih piah lamah point khat hlohin point sarih a hlawh chhuak a, league kal mekah setter zinga Kuriz Player of the Match lawmman dawng hmasa ber a ni.

Lalmama bakah Suryansh leh Fabian-a te an che ṭha a, Hunthar tana ball vaw tlatu pahnih hi Tuichangral innghahna Mahela leh Saitea te aiin an khel ṭha zawk a, Uttar Pradesh spiker Suryansh chuan point 32 hmuin, 11 a hloh a, khaw chhak team-in Sri Lanka atanga an lak luh Mahela chuan vawi 29 a vuak tlak chanve point a hloh. Kolasib chhuanvawr Fabian-a'n tum 17 hlap tlain vawi nga a tisual a, Khawhai tlangval Saitea'n point 18 a hmuh zahve a paih ve thung.

Insiamṭhat ngai Tuichangral

Tuichangralin an match hmasa berah Khawbel an hneh lo nghal a, a hnuah TNT leh champion lai Anastasia hneh zawnin hma lam an pan a, team boruak ṭha tak hnuaiah kar khat chuang inbuatsaihna hun nei chungin Hunthar hmaah an inlan.

Mahse Hunthar lakah beisei an pha lo a, set hmasa ber la thei tura 16-11-a hma an hruai hnuah an inpawh thlaktir bakah, Anastasia an hneh ṭuma point 40 hmu thei Mahela a che ṭha tawk lo a, a kutthlak a nat loh bakah team-in an mamawhna a san hun laiin a dingchhuak thei lo.

A vawi khat nan champion thei turin Tuichangralin beiseina nei mah se, an beiseina a tlahniam leh a, table-ah pathumna luah zui mah se vawi li an khelh tawhah Chhinga Veng Spikers nen point ruk ve ve hmuin set an lak zat a inang a, set hloh tlem zawk an nih vangin an sang zawk. Zanina Chhinga Veng nen an inkhelh hunah team pahnihte tan chak loh a pawi tawh dawn a, inkhel hmuhnawm a beisei ngam.

Hetihlai hian Hunthar erawh an match hnuhnung berah Thutak Nunpuitu Team (TNT) hneh lo mah se an tlu rei lo a, Tuichangral lakah hnehna changin pahnihnaah an insawh nghet a, vawi li an khelh tawhah point 10 hmuin, anni aia vawi khata khel tam Anastasia Electric Veng aiin point khatin an hniam a, champion turin kawng dik an zawh.