Barca-ah Gordon lut dawn

La Liga champion Barcelona chuan Newcastle United forward Anthony Gordon an la lut dawn a, England World Cup squad-a koh player manah hian pound maktaduai 69.3 an inseng dawn.

Gordon hian World Cup khel tura England squad a zawm hmain tihfel ngaite a tifel vek dawn nia sawi a ni a, he thuziak i chhiar meuh chuan an tifel vek tawh hial mai thei.

German champion Bayern Munich pawhin Gordon hi an dawr nia sawi a ni a, mahse, Vincent Kompany-a team hian an ngam huai tawk loh avangin Barcelona zawkin an chang dawn ta.

Magpies hian season hmasa khan an club top scorer Alexander Isak chu Liverpool lakah an lo chân tawh a, Isak chungchangah hian an buai rei hle. Hei vang hian Magpies hian an player-te chu, an phu ang tawka dawr an awm a nih chuan chelh reng lo a, chhuahtir mai zel hi an duh tawh niin an sawi.

Newcastle chief executive David Hopkinson chuan March thla khan an player-te chu an beisei ang leh duh dan thlapa dawr an awm chauha an hralh tur thu a sawi a, Gordon hi season tawp hma hauh khan a chhuah a rinawm sa.

English forward hian kum 2030 thleng Magpies-ah contract nei mah se, dawrtu a neih reng avangin manager Eddie Howe chuan season tawp lamah khan season thar inbuatsaih nan Gordon hi bench-ah vawi li ngawt a dah tawh.

Gordon hian kum 2023 khan Everton aṭangin Newcastle hi £45mtd-in a zawm a, Merseyside club hian Magpies-in an hralh chhawng a nih chuan, a hlawkna an tel aṭanga 15% an dawng ve dawn.

Kum 25 mi Gordon hian season hman zawh takah khan Magpies tan inelna hrang hrangah match 46 khelin goal 17 a khung a, assist vawi nga a nei tel bawk.